پنجاب میں زراعت کو جدید بنانے کیلئے زرعی سہولیات ایک چھت تلے فراہم کرنے کے منصوبے کا آغاز

بہاولپور(اردوپوائنٹ اخبار تازہ ترین۔15فروری 2025ء) پنجاب میں زراعت کو جدید بنانے کیلئے زرعی سہولیات ایک ہی چھت تلے فراہمی کرنے کے منصوبے کا آغازکر دیا، چولستان میں گرین پاکستان منصوبے کی افتتاحی تقریب کنڈائی اور شاپو کے علاقوں میں منعقد ہوئی جس میں آرمی چیف جنرل سید عاصم منیر،وزیراعلیٰ پنجاب مریم نواز شریف سمیت نیشنل فوڈ سیکیورٹی کے وفاقی وزیر رانا تنویر حسین، وفاقی وزیر آبی وسائل ڈاکٹر مصدق ملک اور پنجاب کی سینئر وزیر مریم اورنگزیب سمیت دیگر وزرا بھی موجود تھے۔

پنجاب میں زراعت کو جدید بنانے کے لیے انقلابی اقدام اٹھاتے ہوئے پانچ ہزار ایکڑ پر مشتمل جدید زرعی فارم کا بھی آغاز کیا گیا ہے جہاں جدید زرعی طریقے اور آبپاشی کے جدید نظام کو استعمال میں لایا جائے گا جس سے کم پانی میں زیادہ پیداوار ممکن ہوگی۔

(جاری ہے)

زرعی تحقیق اور سہولت مرکز میں زمین کی جانچ سمیت تمام زرعی خدمات بھی فراہم کی جائیں گی اور ملک بھر کے زرعی تحقیقی اداروں سے تعاون کو یقینی بنایا جائے گا۔

اس موقع پر گرین ایگری مال اینڈ سروسز کمپنی، سمارٹ ایگری فارم، زرعی تحقیق اور سہولت مرکز کا بھی افتتاح کیا گیا۔ یہ ادارہ کسانوں کو ان کے گھروں کے دروازے پر معیاری بیج، کھاد اور کیڑے مار ادویات رعایتی نرخوں پر فراہم کرے گا، جبکہ ڈرونز سمیت جدید زرعی مشینری بھی کم قیمت پر دستیاب ہوگی۔ اس موقع پر تقریب سے خطاب کرتے ہوئے وزیراعلیٰ پنجاب مریم نواز نے کہا کہ زراعت کی ترقی درحقیقت کسان کی خوشحالی اور پاکستان کی معیشت کی مضبوطی کی ضمانت ہے۔

آج پنجاب میں جدید زراعت کے انقلاب کی بنیاد رکھ دی گئی ہے۔ ان منصوبوں کا آغاز کسانوں کی ترقی کے ایک نئے دور کا آغاز ہے۔یاد رہے کہ گزشتہ روزآرمی چیف جنرل عاصم منیر، وزیراعلی پنجاب مریم نواز، وفاقی وصوبائی وزرا اوراعلیٰ حکومتی عہدیداران نے ایس آئی ایف سی کے گرین کارپوریٹ انیشی ایٹو کا دورہ، وزیراعلیٰ پنجاب نے تین منصوبوں کا باقاعدہ افتتاح کیا تھا۔

وزیراعلیٰ پنجاب نے سمارٹ ایگری فارم، گرین ایگری مالز اور ایگری ریسرچ سہولت سنٹرکا باقاعدہ افتتاح کیا تھا۔ دورے کے دوران آرمی چیف جنرل عاصم منیر اور وزیراعلی پنجاب مریم نواز کے ہمراہ وفاقی وصوبائی وزرا، زرعی شعبے کے متعلقہ افسران بھی موجود تھے۔شرکاءکو زرعی شعبے کی ترقی کیلئے استعمال ہونے والی جدید زرعی مشینری کا معائنہ بھی کرایا گیا تھا۔عام کسانوں کی تربیت کیلئے سمارٹ ایگری فارم کا قیام، ملک کی 95 فیصد زراعت کی ترقی کا ضامن ہے۔ آرمی چیف جنرل عاصم منیر اور وزیر اعلیٰ پنجاب مریم نواز نے زرعی شعبے کی ترقی کیلئے جی پی آئی کی کاکردگی پر مکمل اطمینان کا اظہار کیا گیا تھا۔