ڈپٹی کمشنر کا تحصیل ہیڈ کوارٹر ہسپتال خیر پور ٹامیوالی کا دورہ ، ہسپتال کے مختلف شعبوں کا معائنہ کیا

بہاولپور (اُردو پوائنٹ اخبارتازہ ترین - اے پی پی۔ 11 جون2025ء) ڈپٹی کمشنربہاول پور ڈاکٹر فرحان فاروق نے تحصیل ہیڈ کوارٹر ہسپتال خیر پور ٹامیوالی کا دورہ کیا۔انہوں نے ٹی ایچ کیو ہسپتال میں زیر علاج مریضوں کی عیادت کی اور طبی سہولیات، سروس ڈیلیوری اور مریضوں کی نگہداشت کے امور کا تفصیلی جائزہ لیا۔ ڈپٹی کمشنر نے تحصیل ہیڈ کوارٹر ہسپتال کے مختلف وارڈز کے معائنے کے ساتھ ادویات کا سٹاک بھی چیک کیا۔

انہوں نے ہسپتال میں صفائی کے نظام کا بھی جائزہ لیا۔ ڈپٹی کمشنر نے میڈیکل آفیسرز،پیرا میڈیکل اور دیگر عملہ کی حاضری چیک کی۔ انہوں نے شعبہ ایمرجنسی، فارمیسی، پتھالوجیکل لیب، ریڈیالوجی اور زنانہ و مردانہ وارڈ زکا بھی معائنہ کیااور مریضوں کو فراہم کردہ طبی سہولیات کا جائزہ لیا۔

(جاری ہے)

انہوں نے ٹی ایچ کیو ہسپتال میں صفائی کے انتظامات کو بہتر بنانے کی ہدایت کی۔

انہوں نے میڈیکل آفیسرز اور پیرا میڈیکل سٹاف سے کہا کہ مریضوں کے دیکھ بھال اور علاج معالجہ کی سہولیات کی فراہمی میں اپنی پیشہ وراں ذمہ داریاں بھر پور طریقے سے ادا کریں۔ علاوہ ازیں ڈپٹی کمشنر نے جنرل بس سٹینڈ خیرپورٹامیوالی کا دورہ کیا۔ انہوں نے کہاکہ صفائی ستھرائی کے کاموں پرخصوصی توجہ دی جائے ،مقرر کردہ کرایہ نامہ کی نمایاں جگہ پر آویزاں کیا جائے ۔

ڈپٹی کمشنر نے خیر پور ٹامیوالی میں ترقیاتی کاموں کا بھی جائزہ لیا اور متعلقہ افسران کو ہدایت کی کہ ترقیاتی کاموں پر کام کی رفتار کو تیز کیا جائے ۔ انہوں نے کہا کہ کوالٹی ورک کو ہر صورت میں یقینی بنایا جائے اور جو زیرِ تکمیل پراجیکٹ ہیں ان کو مکمل کیا جائے۔ اس موقع پر اسسٹنٹ کمشنر خیر پور ٹامیوالی شاہد اقبال، چیف ایگزیکٹو آفیسر ہیلتھ بھی ان کے ہمراہ تھے۔