بچوں کی جسمانی نشوونما کیلئے کھیلوں کا فروغ اہمیت کا حامل ہے، ملک مسعود ندیم

بھکر۔10 نومبر(اُردو پوائنٹ اخبارتازہ ترین - اے پی پی۔ 10 نومبر2017ء)بچوں کی جسمانی نشورونما کیلئے کھیلوں کا فروغ انتہائی اہمیت کا حامل ہے۔ یہ بات ڈسٹرکٹ ایجوکیشن آفیسر سکینڈری ملک مسعود ندیم نے گورنمنٹ ماڈل ہائی سکول بھکر میں سکینڈر ی ،ہائیر سکینڈری سکولز ہیڈ ماسٹر ایسوسی ایشن کے زیر اہتمام سکینڈری اور ہائیر سکینڈری سکولوں کے سالانہ کھیلوں کے مقابلوں کی افتتاحی تقریب سے خطاب کرتے ہوئے کہی۔

اس موقع پرہیڈماسٹر ا یسوسی ایشن کے ضلعی جنرل سیکرٹری ڈاکٹر محمد اکرم عزیزکے علاوہ مختلف سکولوں سے آئے ہوئے ہیڈ ماسٹرز‘ پی ای ٹی اور فزیکل ٹیچرزکے علاوہ سکولوں کے بچوں کی کثیر تعداد موجود تھی۔ افتتاحی تقریب سے خطاب کرتے ہوئے ملک محمد مسعود ندیم نے کہا کہ جب ایک جسم صحت مند نہیں ہوگا تو ا س میں فکری صلاحیتیں بھی نہیں پنپ سکیں گی اس لیے طلباء کا تعلیمی سرگرمیوں کو برقرار رکھنے کیلئے ان کے جسم کو صحت مند ہونا ضروری ہے انہوں نے کہا کہ جب تک اپ اچھے سپورٹس مین نہیں ہونگے آپ اچھے سٹوڈنٹ ثابت نہیں ہو سکتے کیونکہ ایک سپورٹس مین میں مقابلہ کرنے اور آگے بڑھنے کی صلاحیت زیادہ ہوتی ہے ۔

(جاری ہے)

انہوں نے ہیڈ ماسٹر ایسوسی ایشن کی کاوشوں کو سراہتے ہوئے انہیں مبارکباد پیش کی ۔ ا نہوں نے کہا کہ ضلع میں کھیلوں کا بروقت انعقاد ممکن بنایا اور اس کا افتتاح کرانے میںبھی کامیاب ہوئے ۔انہوں نے کہا کہ سینئر ہیڈ ماسٹر زکیساتھ ساتھ ہمارے ہیڈ ماسٹر پی ای ٹی اور فزیکل ٹیچر بھی اس سپورٹس ایونٹ میں بڑھ چڑھ کر حصہ لیں اور اپنے تعاون سے اسے کامیاب بنائیں ۔بعد ازاں ڈی ای او نے ہاکی سے بال کو ہٹ مارکر سالانہ کھیل 2017-18کا باقاعدہ افتتاح کیا۔ اس موقع پر انہوں نے گورنمنٹ ماڈل ہائی سکول بھکر اور گورنمنٹ ہائی سکول کراڑی کوٹ کے طلباء کے درمیان رسہ کشی کا مقابلہ بھی دیکھا جس میں ماڈل ہائی سکول کے طلباء نے کامیابی حاصل کی ۔