ڈسکہ میں ناکے پر رکشہ نہ رکنے پر پولیس کی فائرنگ سے مسافر خاتون جاں بحق

ڈسکہ پولیس نے اے ایس آئی وقاص مسعود کو گرفتار کر کے حوالات میں بند کردیا، مقدمہ درج وزیراعلیٰ پنجاب نے پٹرولنگ ہائی وے پولیس کی فائرنگ سے خاتون کے جاں بحق ہونے کا نوٹس لے لیا ، پولیس سے رپورٹ طلب

جمعہ 25 فروری 2022 14:45

ڈسکہ (اُردو پوائنٹ اخبارتازہ ترین - این این آئی۔ 25 فروری2022ء) تھانہ صدر ڈسکہ کے علاقہ میں پٹرولنگ پولیس اہلکار کی فائرنگ سے خاتون جاں بحق ہوگئی۔گوجرانوالہ کے علاقے کنگنی والا کی رہائشی 33 سالہ تنزیلہ گاؤں بناں میں شادی کی تقریب میں شرکت کے لیے رکشہ پر جارہی تھی جو پٹرولنگ پولیس کے اے ایس آئی کی گولی لگنے سے ہلاک ہو گئی۔اے ایس آئی وقاص مسعود کے مطابق رکشہ ڈرائیور نے ناکے پر رکشہ نہ روکا جس پر اس نے سرکاری گن سے فائرنگ کی۔

تھانہ صدر ڈسکہ پولیس نے اے ایس آئی وقاص مسعود کو گرفتار کر کے حوالات میں بند کردیا۔ خاتون کے شوہر کی مدعیت میں اے ایس آئی وقاص مسعود کے خلاف تھانہ صدر ڈسکہ میں مقدمہ درج کرلیا گیا۔وزیراعلیٰ پنجاب سردار عثمان بزدار نے پٹرولنگ ہائی وے پولیس کی فائرنگ سے خاتون کے جاں بحق ہونے کا نوٹس لیتے ہوئے انسپکٹر جنرل پولیس سے رپورٹ طلب کرلی۔

(جاری ہے)

وزیراعلیٰ عثمان بزدار نے کہا کہ گرفتار اے ایس آئی کے خلاف سخت قانونی کارروائی کی جائے، فائرنگ کرنے والے اے ایس آئی کے خلاف محکمانہ کارروائی بھی عمل میں لائی جائے، جاں بحق خاتون کے لواحقین کو ہر صورت انصاف فراہم کیا جائے، اے ایس آئی کی فائرنگ سے خاتون کے جاں بحق ہونے کا واقعہ انتہائی افسوسناک ہے، فائرنگ کرنے والا پولیس اہلکار سخت سزا کا مستحق ہے۔