فیصل آباد کی مختلف صنعتی ، کاروباری ، تجارتی تنظیموں کی 30 جون کو ختم ہونے والی ٹیکس ایمنسٹی سکیم مدت میں توسیع کی اپیل

فیصل آباد (اُردو پوائنٹ اخبارتازہ ترین - اے پی پی۔ 24 جون2019ء) فیصل آباد کی مختلف صنعتی ، کاروباری ، تجارتی تنظیموں نے 30 جون کو ختم ہونے والی ٹیکس ایمنسٹی سکیم کی مدت میںمناسب توسیع کی اپیل کی ہے اور وزیر اعظم عمران خان ، وفاقی وزارت خزانہ اور ایف بی آر کے چیئر مین سے استدعا کی ہے کہ ٹیکس ایمنسٹی سکیم جس کے اختتام میں صرف 5روز باقی رہ گئے ہیں کم از کم 2سے 3ماہ کی توسیع کی جائے تاکہ زیادہ سے زیادہ لوگ اس سکیم سے فائدہ اٹھا سکیں اور حکومت کو بھی اس ضمن میں مقرر کردہ اہداف حاصل کرنے میں آسانی رہے۔

مذکورہ تنظیموں کے عہدیداران و ممبران کی جانب سے کہا گیا ہے کہ تاریخ میں توسیع کے ساتھ ساتھ ٹیکس ایمنسٹی سکیم کی شرح بھی 5فیصد سے کم کر کے 2فیصد بنائی جائے۔آل پاکستان انجمن تاجران ، پاکستان ٹریڈرز ایسوسی ایشن اور انجمن تاجران سٹی فیصل آباد سمیت دیگر تنظیموں کا کہنا ہے کہ اس وقت پہلے ہی مارکیٹ میں کاروباری صورتحال مندے کا شکا ر ہے جبکہ پیسے کی کمی کی وجہ سے صنعتی ، کاروباری ، تجارتی سرگرمیاں متاثر ہو رہی ہیں لہٰذا ان حالات میں ٹیکس ایمنسٹی سکیم کی مدت میں مناسب اضافہ اشد ضروری ہے۔

(جاری ہے)

انہوںنے کہاکہ کاروباری لوگ اس سکیم سے فائدہ اٹھانا چاہتے ہیں لیکن اس وقت ان کے پاس اتنا سرمایہ دستیاب نہیں کہ وہ 5فیصد کے حساب سے ادائیگی کر سکیں۔انہوںنے کہا کہ تاجر طبقے نے پہلے بھی ہمیشہ حکومت کے ساتھ بھر پور تعاون کیا ہے جبکہ تاجر برادری آئندہ بھی حکومت کے ساتھ ملکی مفاد کیلئے اپنا مکمل تعاون جار ی رکھے گی۔