امریکن بائیو میڈیکل انجینئرنگ کمپنی کا فیڈمک کے اکنامک زون میں پاکستان میں بائیو میڈیکل آلات کی مینوفیکچرنگ کا پہلا یونٹ لگانے کا اعلان

فیصل آباد (اُردو پوائنٹ اخبارتازہ ترین - اے پی پی۔ 18 فروری2020ء) امریکن بائیو میڈیکل انجینئرنگ کمپنی نے فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی (فیڈمک) کے اکنامک زون میں پاکستان میں بائیو میڈیکل آلات کی مینوفیکچرنگ کا پہلا یونٹ لگانے کا اعلان کیا ہے جس میں امراض قلب کے علاج و آپریشن میں ٓاستعمال ہونے والی بائیو میڈیکل پروڈکٹس اور ڈسپوزیبل تیار کئے جائیں گے جبکہ فیڈمک مذکورہ مینو فیکچرنگ یونٹ کیلئے مفت زمین فراہم کرے گی۔

اس سلسلہ میں امریکن بائیو میڈیکل انجینئرنگ کمپنی کے ڈائریکٹر ڈاکٹر عثمان مصطفی نے فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی (فیڈمک) کے چیئرمین میاں کاشف اشفاق سے ملاقات کی اور ان کے ہمراہ ایم تھری انڈسٹریل سٹی اور سی پیک کے تحت بننے والے ترجیحی اکنامک زون علامہ اقبال انڈسٹریل سٹی کا دورہ کیا۔

(جاری ہے)

اس موقع پر انہوں نے بتایا کہ ابتدائی طور پر اس مینوفیکچرنگ یونٹ میں امراض قلب کے علاج و آپریشن میں استعمال ہونے والی بائیو میڈیکل پروڈکٹس اور ڈسپوزیبل تیار کئے جائیں گے جو پہلے بیرون ملک سے درآمد کئے جاتے ہیں جبکہ اگلے مرحلے میں یہاں دل کے علاج میں استعمال ہونیوالے سٹنٹس اور دیگر جدید طبی سامان بھی تیار کیا جائے گا جس سے نہ صرف پاکستان میں علاج سستا ہو گا بلکہ اس طبی سامان کی برآمد سے پاکستان کو کثیر زرمبادلہ بھی حاصل ہو گا۔

ڈاکٹر عثمان مصطفی نے بتایاکہ یہاں ایک ریسرچ سینٹر بھی بنایا جائے گا جس سے پاکستان کیلئے اس شعبے میں ترقی کے نئے راستے کھلیں گے۔ چیئرمین فیڈمک نے کہا کہ اس مینوفیکچرنگ یونٹ کیلئے فیڈمک کی طرف سے مفت زمین فراہم کی جائے گی تاکہ پاکستان میں بائیو میڈیکل انجینئرنگ کے شعبے کی بنیاد ڈال کر سیکٹر ڈویلپمنٹ کا آغاز کیا جا سکے۔ انہوں نے کہا کہ آنے والے وقت میں دنیا بھر سے مزید سرمایہ کار فیڈمک کے صنعتی زونز میں سرمایہ کاری کریں گے جس سے وزیراعظم عمران خان کے ویژن پر عمل کرتے ہوئے پاکستان میں انڈسٹریلائز یشن کو فروغ دیا جا سکے گا۔