فیصل آباد، شہر میں صفائی کا معیار بلند کرنے کے لئے مزید اقدامات کئے جائیں، ڈپٹی کمشنرمحمد علی

فیصل آباد (اُردو پوائنٹ اخبارتازہ ترین - آن لائن۔ 19 اکتوبر2019ء) ڈپٹی کمشنر/چیئرمین بورڈ آف ڈائریکٹرزفیصل آباد ویسٹ مینجمنٹ کمپنی محمد علی نے کہا ہے کہ شہر میں صفائی کا معیار بلند کرنے کے لئے مزید اقدامات کئے جائیں تاکہ شہریوں کی توقعات کے مطابق شہر ہر لحاظ سے صاف ستھرا اور خوبصورت نظر آئے۔انہوں نے یہ بات اپنے آفس میں فیصل آباد ویسٹ مینجمنٹ کمپنی کی کارکردگی کے بارے میں بریفنگ لیتے ہوئے کہی۔

اسسٹنٹ کمشنر(سٹی) زوہا شاکر،سی ای او ویسٹ مینجمنٹ کمپنی کاشف رضا اعوان،سینئر مینجر آپریشن اعجاز بندیشہ اور دیگر افسران بھی موجود تھے۔ڈپٹی کمشنر نے کہا کہ شہر میں صفائی ستھرائی کے حوالے سے واضح نتائج سامنے آنے چاہیں جبکہ کوڑا کرکٹ کو ٹھکانے لگانے کے اقدامات کو بھی محفوظ اور قابل بھروسہ بنایا جائے اس ضمن میں کوڑا لیکر چلنے والی گاڑیوں کی حالت بہتر ہونی چاہیے تاکہ نقل وحمل کے دوران ان سے سڑکوں پر کوڑا گرنے کا احتمال نہ رہے۔

(جاری ہے)

انہوں نے کہا کہ ہیلپ لائن کوہمہ وقت فعال رکھیں اور کسی بھی شکایت کا فوری ازالہ کیا جائے۔انہوں نے کہا کہ شاہرات سے پودوں کی کانٹ چھانٹ ودیگر کوڑا کرکٹ اٹھانے کے سلسلے میں صفائی کے نظام کے بہتر نتائج حاصل ہونے چاہیں۔اس موقع پر سی ای او ویسٹ مینجمنٹ کمپنی کاشف رضا اعوان نے کمپنی کے مالیاتی وانتظامی امور،افرادی وتکنیکی وسائل پر بریفنگ دی اوربتایا کہ صفائی آپریشن کے لئے شہر کی یونین کونسلز کو دو زونز ایسٹ،ویسٹ میں تقسیم کیا گیاہے اور صفائی کے عمل کی روزانہ کی بنیاد پر مانیٹرنگ کی جارہی ہے۔

انہوں نے بتایا کہ شہر سے روزانہ ساڑھے بارہ سو سے زائد میٹرک ٹن کوڑااکٹھا کرکے سائٹ پر ڈمپ کیا جارہا ہے اور رہ جانے والی ویسٹ کو بھی جمع کرنے کے لئے موثر حکمت عملی وضع کی جارہی ہے۔انہوں نے بتایا کہ ہیلپ لائن 1139فنکشنل اورعوامی شکایات کابلاتاخیر ازالہ ترجیح ہے جبکہ ویسٹ ورکرز کی حاضری کویقینی بنانے کے ساتھ دیگر مختلف محکموں سے مربوط کوآرڈینیشن کویقینی بنایا جا رہا ہے۔