فیصل آباد،گورنمنٹ گرلز ہائر سیکنڈری سکول چک 202ر۔ب میں سالانہ سپورٹس گالامنعقد ہوا

منگل 30 نومبر 2021 23:51

فیصل آباد(اُردو پوائنٹ اخبارتازہ ترین - این این آئی۔ 30 نومبر2021ء) گورنمنٹ گرلز ہائر سیکنڈری سکول چک 202ر۔ب میں سالانہ سپورٹس گالا منعقد ہوا۔وزیر اعلی پنجاب کے معاون خصوصی برائے کھیل و امور نوجوانان ملک عمر فاروق اور صوبائی وزیر وزیراعلی معائنہ ٹیم محمد اجمل چیمہ مہمانان خصوصی تھے۔اس موقع پرطالبات سمیت ٹیچرز اور والدین کی بڑی تعداد بھی موجود تھی۔

طالبات کے ایک دستہ نے مارچ پاسٹ کرتے ہوئے معزز مہمانان کو سلامی پیش کی۔سالانہ سپورٹس گالا کے موقع پر طالبات نے کرکٹ،باسکٹ بال،بیڈمنٹن،رسہ کشی،فلیٹ ریس،ہرڈل ریس سمیت دیگر کھیلوں میں شاندار پرفارمنس دے کر حاضرین سے خوب داد وصول کی۔سکول کی پرنسپل نے اپنے خطبہ استقبالیہ میں مہمانان خصوصی کا شکریہ ادا کیا جبکہ ان کی علم دوستی اور سکول سے محبت کو بھی سراہا۔

(جاری ہے)

اپنے صدارتی خطبہ میں طالبات کے مثالی ڈسپلن اور کارکردگی کو سراہتے ہوئے مہمان خصوصی ملک عمر فاروق نے کہا کہ طالبات کی تعلیم و تربیت کے ساتھ ساتھ صحت مندانہ سرگرمیوں میں شرکت انہیں معاشرے کا مفید شہری بنانے میں اہم ترین کردارادا کرتی ہیں جبکہ تعلیم جسمانی اور ذہنی طور پر بچیوں کو بہترین طالب علم بنانے میں بھی معاون ثابت ہوتی ہے۔

بچیوں کی تعلیمی اہمیت کو اجاگر کرتے ہوئے ملک عمر فاروق نے کہا کہ معاشرتی اور سماجی بیداری میں خواتین کا اہم کردار ہے جسے ہرگز فراموش نہیں کیا جاسکتا۔انہوں نے مزید کہا کہ تعلیم کو ہمیشہ با مقصد ہونا چاہیے بلکہ اسے نصابی سے زیادہ تربیتی خطوط پر استوار کیا جانا چاہئے۔اس موقع پرخطاب کرتے ہوئے صوبائی وزیر محمد اجمل چیمہ نے کہا کہ کھیل انسان کی ذہنی نشوونما میں اہم کردار اداکرتے ہیں اور کھیلوں کے مقابلے انسان میں قوت برداشت اور عملی زندگی میں ہارجیت کاسامنا کرنے کا حوصلہ پیدا کرتے ہیں۔

انہوں نے کہا کہ خواتین کو تعلیم،کھیل اور دیگر شعبوں میں مساوی حقوق اور مواقع فراہم کرکے ایک ترقی یافتہ فلاحی معاشرے کی صورت گری کی جا سکتی ہے۔مہمانان گرامی نے کھیلوں کی بہترین تیاری پر اساتذہ کرام کو مبارک پیش کرتے ہوئے کہا کہ طلباء وطالبات کا ہرگیم میں اعلیٰ کار کردگی کا مظاہرہ کرنا قابل تعریف ہے،اگرآپ اسی طرح طالبات کی تیاری پر محنت کرتے ر ہے تو یہ آنیوالے وقت میں ملک کی بڑی ٹیموں کا حصہ بن کر پوری دنیا میں پاکستان کا نام روشن کریں گی۔

فیصل آباد میں شائع ہونے والی مزید خبریں