شاہراہ قراقرم پر مسافر گاڑیوں کی روانگی کیلئے مخصوص وقت کی پابندی ختم

گلگت (اُردو پوائنٹ اخبارتازہ ترین - اے پی پی۔ 23 مئی2019ء) شاہراہ قراقرم پر مسافروں گاڑیوں کی روانگی کیلئے مخصوص وقت کی پابندی ختم کردی گئی، محکمہ داخلہ گلگت بلتستان سے جاری نوٹیفکیشن کے مطابق ڈسٹرکٹ انٹیلی جنس کمیٹی کی سفارشات پر آئی جی پولیس نے ٹائمنگ سسٹم ختم کرنے کی منظوری دیدی ہے جس کے بعد اب مسافر گاڑیاں کسی بھی وقت راولپنڈی سے گلگت بلتستان اور جی بی سے راولپنڈی کسی بھی وقت سفر کر سکیں گی۔

(جاری ہے)

تاہم مسافرگاڑیوں کیلئے فول پروف سکیورٹی پلان مرتب کیا جائے گا، سکیورٹی پلان کمشنر دیامر استور ڈیژن مرتب کریںگے، نوٹیفکیشن کا اطلاق کمشنر دیامر استور کی جانب سے سکیورٹی پلان فراہم کرنے کے روز سے لاگو ہوگا۔ مسافر گاڑیوں کی سکیورٹی پلان کے حوالے سے کے پی کے محکمہ داخلہ سے بھی رابطہ کیا گیا ہے اور ان سے سکیورٹی کیلئے سپورٹ فراہم کرنے کی درخواست کی گئی ہے۔

واضح رہے کہ سکردو سے راولپنڈی جانے والی مسافرگاڑیوں کو رات جگلوٹ کے مقام پر روک دیا جاتا تھا اور صبح پانچ بجے روانہ ہونے کی اجازت دی جاتی تھی، جگلوٹ میں ہوٹل مالکان کے ہاتھوں مسافروں کو لوٹنے اور سردیوں میں سخت مشکلات پیش آنے کی شکایات کی جا رہی تھیں، عوام کی جانب سے ذمہ دار حلقوں کو نوٹس لینے کا مطالبہ بھی کیا جا رہا تھا۔