گوجرانوالہ۔پولیس اور عوام کے درمیان دوریاں ختم کرنے میں میڈیا کا کردار انتہائی اہمیت کا حامل ہے، اے ایس پی سرکل وزیرآباد

گو جرانوالہ۔ (اُردو پوائنٹ اخبارتازہ ترین - اے پی پی۔ 17 جنوری2020ء) اے ایس پی سرکل وزیرآباداکرام اللہ خان نے کہا ہے کہ پولیس اور عوام کے درمیان دوریاں ختم کرنے میں میڈیا کا کردار انتہائی اہمیت کا حامل ہے۔ آئی جی پنجاب پولیس کے احکامات کے مطابق آر پی او گوجرانوالہ طارق عباس قریشی اور سی پی او گوجرانوالہ کی زیر نگرانی پولیس سرکل وزیرآباد جرائم پیشہ افراد کا قبلہ درست کرنے کیلئے اپنی تمام تر توانائیاں صرف کررہی ہے، معاشرتی برائیوں کے تدارک کیلئے ہم سب کو من حیث القوم انفرادی حیثیت میں کردار ادا کرنا ہوگا۔

صدر پریس کلب افتخار احمد بٹ،جنرل سیکرٹری صابر حسین بٹ اور سنیئر صحافی محمود احمد خان لودھی،شیخ صلاح الدین کی قیادت میں ملنے والے وفد سے گفتگو میں اے ایس پی کا کہنا تھا کہ سرکل پولیس کے ایس ایچ اوز اور ماتحت عملہ عوام الناس کی جان ومال کے تحفظ کیلئے ہمہ وقت چوکس ہے۔

(جاری ہے)

انہوں نے بتایا کہ امن وامان کے قیام کیلئے ملکی قوانین پر عملدرآمد کرانا پولیس کی ذمہ داری میں شامل ہے۔

منشیات فروشی، قمار بازی جوا اور دیگر معاشرتی برائیاں جرائم کی بنیاد ہیں ان پر قابو پانے کیلئے پولیس ٹیمیں پوری طرح متحرک ہیں۔ بغیر نمبر پلیٹس موٹر سائیکلوں اور گاڑیوں کے خلاف خصوصی مہم شروع کی گئی ہے۔ میرج ہالوں میں ون ڈش کی خلاف ورزی اور پتنگ بازی جیسے ممنوعہ اقدامات کرنے والوں کے خلاف قانون کے مطابق کاروائی کی جائے گی۔ اے ایس پی اکرام اللہ خان نے بتایا کہ پولیس گشت کے نظام کو موثر بنایا گیا ہے۔

سرکل کے علاقوں میں پولیس کی موبائل ٹیمیں چوبیس گھنٹے اپنے فرائض سرانجام دے رہی ہیں۔ مختلف مقدمات میں مطلوب اشتہاری ملزمان کے علاوہ چوری ڈکیتی کی وارداتوں میں ملوث ملزمان کو بھی قانون کی گرفت میں لایا گیا ہے جس سے علاقے میں امن وامان کی فضاء بہتر ہوئی ہے۔اس موقعہ پر انسپکٹر سکندر، ایس ایچ او تھانہ سٹی بلال بھٹی،سنیئر صحافی نثار احمد اور عقیل احمد لودھی بھی موجود تھے۔