جمعیت علماء پاکستان (نورانی) کا گورنمنٹ کالج یونیورسٹی کے قیام پر مسرت کا اظہار

حیدرآباد(اُردو پوائنٹ اخبارتازہ ترین - این این آئی۔ 23 اکتوبر2019ء) جمعیت علماء پاکستان (نورانی) کے مرکزی میڈیا کوآرڈنیٹر ڈاکٹر محمد یونس دانش نے گورنمنٹ کالج یونیورسٹی کے قیام پر مسرت کا اظہار کرتے ہوئے امید ظاہر کی ہے کہ یونیورسٹی کے قیام سے نہ صرف جی وارڈ کے طلباء کو تعلیمی سہولت میسرآئیں گی بلکہ حیدرآباد شہر اور اس کے اطراف کے طلباء بھی زیور تعلیم سے فیضیاب ہوں گے اور حیدرآباد کے طلباء کی محرومیوں میں کمی آئے گی۔

ایک بیان میں انہوں نے کہا کہ شہری نوجوان باالخصوص پھلیلی پریٹ آباد، گئو شالہ، الیاس آباد، اسلام آباد، آفندی ٹاؤن، مسان روڈ ہیرآباد، لیاقت کالونی ،فردوس کالونی ،سرفراز کالونی ،مارکیٹ ،فقیر کا پڑ،گجراتی پاڑہ، بھٹی گوٹھ، نورانی بستی کے طلبہ جو جامشورو تک سفر نہیںکرسکتے تھے ان پر شہر کے اندر ہی اعلیٰ تعلیم کے دروازے کھل گئے ہیں حیدرآباد کے نوجوان کو چاہئے کہ وہ اعلیٰ تعلیم کے حصول کی اس سہولت سے فائدہ اٹھاتے ہوئے گورنمنٹ کالج یونیورسٹی میں 8 نومبر تک جاری داخلوں سے فائدہ اٹھاتے ہوئے اپنے مستقبل کو روشن بنائیں، انہوں نے کہا کہ گورننٹ کالج یونیورسٹی میں اعلیٰ تعلیم کے ساتھ ساتھ جدید تعلیمی سہولتیں فراہم کی جائیں تاکہ حیدرآباد کے شہری جدید تعلیمی سہولتوں سے آراستہ ہو سکیں۔

(جاری ہے)

علاوہ ازیں جمعیت علماء پاکستان (نورانی)یوسی 13کا ورکز اجلاس ہوا جس سے جے یو پی کے مرکزی میڈیا کوآرڈنیٹرڈاکٹر محمد یونس دانش ،صوبائی نائب صدر ناظم علی آرائیں،صوبائی چیف آرگنائزرپیر سید سعید احمد شاہ سنگھانوی،علامہ غلام سرور امینی نے خطاب کرتے ہوئے کہا کہ نظام مصطفیٰؐ کے نفاذ کی جدوجہد اسلام انقلاب کی راہ ہموار کرے گی پاکستان کے قیام کا حقیقی مقصد حاصل کرنے کیلئے اسلام کو پاکستان میں حقیقی طور پر نافذ کرنا ہوگاانہوں نے کہا کہ قیام پاکستان کی مخالفت کرنے والے آزادی مارچ کی آڑ میں ملک میں انتشار پھیلانے کی کوشش کررہے ہیں اگر انہیں کشمیریوں سے ذرہ برابر بھی محبت ہے تو اسلام آباد کی بجائے کشمیر کے باڈرکی طرف رخ کرلیں جہاں مقبوضہ کشمیر مین2-1/2ماہ سے مظلوم کشمیری ظلم کی چکی میں پس رہے ہیں سینٹ الیکشن میں اپوزیشن کی ناکامی نے مشترکہ اپوزیشن کا بھانڈا پھوڑ دیا تھاکرپٹ لوگوں کو بچانے کیلئے عوام کی آنکھوں میں دھول جھونکنے کی کوشش کی جارہی ہے۔