گوادر میں ریئل اسٹیٹ کے بزنس میں سرمایہ کاروں کے لئے مواقع موجود ہیں، چنگیز بلوچ

اسلام آباد ۔ (اُردو پوائنٹ اخبارتازہ ترین - اے پی پی۔ 16 اکتوبر2018ء) گوادر ڈویلپمنٹ اتھارٹی کے ڈپٹی ڈائریکٹر چنگیز بلوچ نے کہاہے کہ گوادر میں ریئل اسٹیٹ کے بزنس میں سرمایہ کاروں کے لئے مواقع موجود ہیں، ملک بھر سے سرمایہ کار یہاں ریئل اسٹیٹ کے شعبہ میں سرمایہ کاری میں دلچسپی لے رہے ہیں۔ اے پی پی سے گفتگو کرتے ہوئے انہوں نے کہاکہ مستقبل قریب میں چین پاکستان اقتصادی راہداری کا مرکز بننے کے امکانات کے تناظر میں گوادر میں گزشتہ چند ماہ کے دوران ریئل اسٹیٹ کی قیمتوں میں کئی گنااضافہ ہوا ہے۔

گوادر میں ریئل اسٹیٹ کے شعبہ میں سرمایہ کاری میں امکانات موجود ہیں کیونکہ یہاں پر لوگ اپنی نجی اراضی پر ہائوسنگ کالونی بنا رہے ہیں۔ انہوں نے کہاکہ گوادر میں تجارتی سرگرمیاں بڑھ رہی ہیں شہر میں تجارت اور کاروباری سرگرمیوں میں ماضی کی نسبت زیادہ ہواہے۔

(جاری ہے)

بہت سارے لوگ سرمایہ کاری کررہے ہیں کیونکہ یہاں پر بہتر نتائج حاصل ہورہے ہیں ۔

ایک سوال کے جواب میں انہوں نے کہاکہ گوادر ڈویلپمنٹ اتھارٹی کے قواعد وضوابط کی پاسداری نہ کرنے والے سرمایہ کاروں کے این او سیز کو منسوخ کیا جائے گا اور اسی طرح مقررہ نظام الاوقات کے مطابق ترقیاتی کام نہ کرنے والوں کے خلاف بھی کاروائی ہو گی۔ انہوں نے کہاکہ اس ضمن میں جی ڈی اے سرمایہ کاروں کے ساتھ تعاون کررہی ہے جبکہ شہر میں میونسپل خدمات کی فراہمی میں بھی ادارہ کردار ادا کررہا ہے۔