اسلام آباد چیمبر کے الیکشن میں فاونڈر گروپ نے میدان مار لیا

کارکردگی کی بنیاد پر کامیابی حاصل کی، مسائل حل کروائیں گے، میاں اکرم فرید بھاری اکثریت سے کامیابی حق سچ کی فتح ہے۔ ظفر بختاوری، اعجاز عباسی کامیابی سے نئی طاقت ملی ہے تاجروں کی خدمت جاری رہے گی، خالد چوہدری

جمعہ 17 ستمبر 2021 00:39

اسلام آباد(اُردو پوائنٹ اخبارتازہ ترین - آن لائن۔ 16 ستمبر2021ء) اسلام آباد چیمبر آف کامرس اینڈ انڈسٹری کے ایگزیکٹو کمیٹی کے الیکشن منعقد ہوئے جس میں ممبران نے جوش و خروش سے حصہ لیا۔ گنتی کے بعد چیف الیکشن کمشنر چوہدری عبدالغفار نے نتائج کا اعلان کیا جس کے مطابق فاؤنڈر گروپ کے تمام امیدوار کامیاب ہوئے، اس طرح آئی سی سی آئی کے ہونے والے الیکشن میں فاونڈر گروپ نے میدان مار لیا اور کامیابی کا سابقہ ریکارڈ برقرار رکھا۔

دن بھر ممبران نے پولنگ میں جوش و خروش سے حصہ لیا، فاونڈر گروپ اور یونائیٹڈ گروپ کے مابین مقابلہ ہوا۔ ایسوسی ایٹ کلاس میں سولہ امیدواروں نے حصہ لیا اور فاؤنڈر گروپ کے تمام آٹھ امیدوار بھاری اکثریت سے کامیاب ہوئے۔ کارپوریٹ کلاس میں بھی 16 امیدوار میدان میں تھے، یونائیٹڈ گروپ کے سات اور ایک امیدوار انفرادی حیثیت میں میدان میں اترا۔

(جاری ہے)

فاؤنڈر گروپ کے تمام آٹھ امیدوار کامیاب قرار پائے۔ بعد ازاں کامیاب ہونے والے امیدواروں کے حامیوں نے جشن منایا اور خوشی کا اظہار کیا اس موقع پر فاؤنڈر گروپ کے چیئرمین میاں اکرم فرید نے خطاب کرتے ہوئے تمام ارکان کو مبارکباد دی۔ انہوں نے کہا کہ کارکردگی کی بنیاد پر کامیابی حاصل کی ہے اور آنے والے عہدے داروں کو مزید محنت کرنا ہو گی۔

کامیابی گروپ میں اتحاد کا مظہر ہے، الیکشن کمپین کے کو چیئرمین اعجاز عباسی، کو چیئرمین عامر وحید اور سابق صدر اور یو بی جی کے سیکریٹری جنرل ظفر بختاوری نے خطاب کرتے ہوئے کہا کہ بھاری اکثریت سے کامیابی حق سچ کی فتح ہے اور الیکشن کمپین جس منظم طریقے سے چلائی گئی کامیابی اسی کا نتیجہ ہے امید ہے کامیاب ہونے والے سارا سال محنت کریں گے۔

اور سابقہ عہدیداروں سے زیادہ کام کرکے دکھائیں گے۔ فاونڈر گروپ الیکشن کمپین کے کوآرڈینیٹر اور سابق سینئر نائب صدر آئی سی سی آئی خالد چوہدری نے کہا کہ کے شہر بھر کی مارکیٹوں کے عہدیداران فاؤنڈر گروپ کے ساتھ ہیں۔ آل پاکستان انجمن تاجران کے صدر اجمل بلوچ نے کہا کہ فاونڈر گروپ کی کامیابی سے اسلام آباد کے تاجروں کا اتحاد مضبوط ہوا ہے جس سے مسائل کے حل میں مدد ملے گی۔

اسلام آباد میں شائع ہونے والی مزید خبریں