اسلام آباد ہائیکورٹ نے بیرونی فنڈنگ کیس کے حوالے سے الیکشن کمیشن کے فیصلے کے خلاف عمران خان کی درخواست پر فیصلہ محفوظ کر لیا

بدھ 18 جولائی 2018 16:37

اسلام آباد ۔ (اُردو پوائنٹ اخبارتازہ ترین - اے پی پی۔ 18 جولائی2018ء) اسلام آباد ہائیکورٹ نے پاکستان تحریک انصاف کے چیئرمین عمران خان کی جانب سے بیرونی فنڈنگ کیس کے حوالے سے الیکشن کمیشن آف پاکستان کے فیصلے کے خلاف دائر درخواست پر فیصلہ محفوظ کر لیا ہے ۔بدھ کو عدالت عالیہ کے جسٹس محسن اختر کیانی پر مشتمل سنگل بینچ نے الیکشن کمیشن آف پاکستان کے 12مارچ کے فیصلے کے خلاف دائر درخواست پر سماعت کی ۔

اس موقع پر پی ٹی آئی کے چیئرمین عمران خان کے وکیل بابر اعوان پیش ہوئے ۔

(جاری ہے)

سماعت کے موقع پر پی ٹی آئی کے سابق رہنماء اکبر ایس بابر کے وکیل احمد حسن شاہ نے اپنے دلائل میں کہا کہ اکبر ایس بابر کو پارٹی سے نکالے جانے کے حوالے سے ستمبر 2011 کا لیٹر سامنے نہیں آیا اور لیٹر کے اصلی ہونے کے بارے میں بھی کوئی ثبوت موجود نہیں ہیں ۔اکبر ایس بابر کے وکیل نے کہا کہ پی ٹی آئی پارٹی فنڈنگ کی کچھ تفصیلات حنیف عباسی کیس میں پہلے ہی پیش کی جا چکی ہیں۔

سماعت کے موقع پر الیکشن کمشین آف پاکستان کے وکیل نے موقف اختیار کیا کہ قانون کے مطابق سکروٹنی کا عمل جاری ہے 31 جولائی کو مسلم لیگ اور پیپلز پارٹی کے خلاف درخواستوں پر بھی سماعت ہے۔عدالت نے فریقین کے دلائل مکمل ہونے پر فیصلہ محفوظ کر لیا ۔