اپنے دور حکومت میں چترال کو ترقی اور خوشحالی دینے آتا تھا،آج ووٹ مانگنے آیا ہوں،پرویز مشرف

اسلام آباد(اُردو پوائنٹ اخبارتازہ ترین - آئی این پی۔ 23 جولائی2018ء) سابق صدر پاکستان اور آل پاکستان مسلم لیگ کے سرپرست اعلیٰ سید پرویز مشرف نے کہا ہے کہ چترال کے لوگ بہت خوبصورت ہیں،ان سے ہمیشہ پیار رہا،اپنے دور اقتدار میں چترالیوں کو ترقی اور خوشحالی دینے آتا تھا، آج ان سے ووٹ مانگنے آیا ہوں،جب بھی پاکستان آئوں گا میری منزل چترال ہوگی،چترال میں اپنا گھراور اسلام آباد میں چترال ہائوس بنائوں گا۔

چترال کے عوام ڈاکٹر محمد امجد اور سہراب خان کو ووٹ دیں، میں سمجھوں گا ان کا ووٹ مجھے ملا۔ ان خیالات کا اظہار انہوں نے حلقہ این اے 01میں ڈاکٹر محمد امجد کی انتخابی مہم کے سلسلے میں منعقد کئے گئے پولو گرائونڈ چترال میں ایک بڑے جلسے سے خطاب کرتے ہوئے کیا۔

(جاری ہے)

انہوں نے کہا کہ چترال کے عوام سے ہمیشہ پیار رہا،میں پولو ٹورنامنٹ دیکھنے چترال آیا کرتا تھا۔

ان لوگوں نے ہمیشہ بہت عزت دی۔اپنے دوراقتدار میں چترال کے عوام کا تیس سال سے رکا ہوا لواری ٹنل کا منصوبہ پورا کیا۔سڑکوں کی تعمیر، پاور پروجیکٹس اور دیگر کئی ایک سہولیات دیں۔ اس وقت میں چترال کے عوام کو ترقی اور خوشحالی دینے آیا کرتا تھا مگر آج میں ان سے ووٹ مانگنے آیا ہوں مجھے امید ہے کہ چترال کے عوام ہمیشہ کی طرح آج بھی مجھے عزت دیں گے۔

انہوں نے کہا کہ چترال کے عوام ڈاکٹر محمد امجد اور سہراب خان کو ووٹ دے کر کامیاب بنائیں تو میں سمجھوں گا کہ انہوں نے مجھے ووٹ دیا ہے۔میں سمجھتا ہوں کہ میرے امیدواران چترال کے عوام کے حق میں دوسروں کی نسبت کہیں زیادہ بہتر ثابت ہوں گے کیونکہ میں جانتا ہوں کہ ان میں انسانیت کی خدمت کا جذبہ پایا جاتا ہے۔ اس کے علاوہ میں خود اپنی نگرانی میں ان سے چترال کی ترقی اور خوشحالی کے لئے کام کروائوں گا۔

سید پرویز مشرف نے کہا کہ وہ جب بھی پاکستان آئیں گے ان کی منزل چترال ہوگی۔ وہ چترال میں اپنا گھر تعمیر کروائیں گے جبکہ اسلام آباد میں چترال ہائوس تعمیر کروائیں گے تا کہ چترال کے عوام آسانی سے اپنے مسائل ہم تک پہنچا سکیں۔اس موقع پر خطاب کرتے ہوئے پارٹی چیئرمین اور این اے 01چترال سے قومی اسمبلی کے امیدوار ڈاکٹر محمد امجد نے کہا کہ وہ اپنے قائد سید پرویز مشرف اور چترال کے عوام کی توقعات پر پورا اتریں گے۔

انہوں نے کہا کہ وہ انتخابات کے بعد بھی عوام کے ساتھ نہ صرف رابطے میں رہیں گے بلکہ ترقی کا سفر وہیں سے شروع کریں گے جہاں پر سید پرویز مشرف کے دور حکومت کے بعد رک گیا تھا۔اس موقع پر فاطمہ سکندر ملہی،شہزادہ گل،سہراب خان،تقدیرہ اجمل،صفدر علی اور چوہدری اسد بھی موجود تھے۔دریں اثناء پی کے 01چترال سے آزاد امیدوار برائے صوبائی اسمبلی اور چترال ٹینکرز ایسوسی ایشن کے چیئرمین شفیق الرحمٰن نے اپنے سینکڑوں ساتھیوں سمیت اے پی ایم ایل کے امیدوار ڈاکٹر محمد امجد کی غیر مشروط حمایت کا اعلان کیا۔