50 لاکھ گھروں کی تعمیر: وزیراعظم آئندہ ہفتے منصوبے کا اعلان کرینگے

ہفتہ 22 ستمبر 2018 16:54

اسلام آباد(اُردو پوائنٹ اخبارتازہ ترین - آن لائن۔ 22 ستمبر2018ء) حکومت نے 50 لاکھ گھر تعمیر کرنے کے لئے حکمت عملی تیارکرلی، وزیراعظم عمران خان آئندہ ہفتے منصوبے کا اعلان کریں گے۔ حکومت نے فوری طور پر گھروں کی تعمیر شروع کرنے کا فیصلہ کیا ہے، 50 لاکھ گھر آسان اقساط پر بے گھر افراد کو دیئے جائیں گے، گھروں کی تعمیر ملک کے مختلف شہروں میں کی جائے گی، گھروں کی تعمیر کے لئے مختلف جگہوں کا جائزہ بھی لے لیا گیا۔

تحریک انصاف نے اپنے منشور میں 50 لاکھ گھر بنانے کا وعدہ کیا تھا۔

(جاری ہے)

ادھر وزیر اعظم آج لاہور کا دورہ کریں گے، عمران خان پنجاب کابینہ کے اجلاس کی صدارت کریں گے۔ وزیر اعظم کو 100 روزہ پلان پر حکومت پنجاب کی جانب سے بریف کیا جائے گا۔ ذرائع کے مطابق، وزیراعظم کو نئے بلدیاتی نظام بارے بھی بریفنگ دی جائے گی، پنجاب حکومت نے بلدیاتی نظام کا حتمی مسودہ تیار کر لیا وزیراعظم پنجاب پولیس کمیشن کے سربراہ ناصر درانی سے بھی ملاقات کریں گے، عمران خان پنجاب بھر کے ڈویڑنل آفیسرز کے ساتھ ویڈیو لنک پر خطاب بھی کریں گے، وزیر اعظم پنجاب کابینہ کے 4 ارکان سے بھی ان کے محکموں بارے خصوصی بریفنگ لیں گے، وزیر اعظم اور وزیر اعلیٰ پنجاب کی ون آن ون ملاقات بھی ہو گی۔