ق* حکومتی وزراء عدالتی فیصلے کی من مانی تشریح کرکے توہین عدالت کررہے ہیں،ن لیگ

ض*عدالت نے شرط نہیں لگائی تھی تو پھر حکومت نے عدالت بننے کی کوشش کیوں کی وزراء نے اپنی پریس کانفرنس میں پیغام دیاہے کہ ان کوعدالت کا فیصلہ قبول نہیں، مریم اورنگزیب کا حکومتی وزراء کی پریس کانفرنس پر ردعمل

اتوار 17 نومبر 2019 22:21

}اسلام آباد(اُردو پوائنٹ اخبارتازہ ترین - آن لائن۔ 17 نومبر2019ء) مسلم لیگ(ن) کی ترجمان مریم اورنگزیب نے حکومتی وزراء کی پریس کانفرنس پر ردعمل میں کہا ہے کہ حکومتی وزراء عدالتی فیصلے کی من مانی تشریح کرکے توہین عدالت کررہے ہیں،وزراء نے اپنی پریس کانفرنس میں پیغام دیاہے کہ حکومت کو عدالت کا فیصلہ قبول نہیں ۔اپنے ایک بیان میں مریم اورنگزیب نے کہا کہ عوام کی دعائوں کے سائے میں منگل کونواز شریف کو بیرون ملک علاج کیلئے الوداع کہیں گے، حکومت نواز شریف، شہباز شریف سے حسدکے بجائے عوام کی خدمت پرتوجہ دے اور کابینہ غورکرے الیکشن کمیشن میں فارن فنڈنگ چوری کے کیس میں جواب کیادینا ہی اللہ نے حکمرانوں کے ہاتھ میں کسی کیلئے خیر نہیں رکھی تو کم ازکم منہ ہی بند کر لیں۔

انہوں نے کہاکہ عدالت نے شرط نہیں لگائی تھی تو پھر حکومت نے عدالت بننے کی کوشش کیوں کی اعلی عدلیہ نے سزامعطلی کے فیصلہ میں تحریرکیا بادی النظرمیں نواز شریف کی سزاغلط ہے،تمام مقدمات میں نواز شریف کی سزا عدالت معطل کرچکی ہے، وزراء نے پریس کانفرنس میں پیغام دیاکہ انہیں عدالتی فیصلہ قبول نہیں،حکومتی وزراء عدالتی فیصلے کی من مانی تشریح کر کے توہین عدالت کر رہے ہیں۔

(جاری ہے)

مریم اورنگزیب کا کہنا تھا کہ ان شااللہ نواز شریف کے صحت یاب ہونے کے بعد وطن واپسی پر شانداراستقبال کرینگے۔