پی اے سی کی ذیلی کمیٹی کے کنوینئر چیئرمین نیب کی عدم موجودگی پر برہم، ہر حال میں پیش ہونے کاحکم

چیئرمین نیب کو بلایا تھا وہ کیوں نہیں آئے کیا چیئرمین نیب کو کمیٹی اجلاس میں بلانے کے لیے پولیس بھیجی جائے ،نور عالم خان کوئی بھی شخص قانون سے بالاتر نہیں ہے،چاہے ہم پر جتنے مرضی مقدمات بنائیں چیئرمین نیب جسٹس (ر) جاوید اقبال کو کمیٹی میں پیش ہونا ہی پڑے گا، کمیٹی میں اظہار

جمعرات 20 فروری 2020 00:10

اسلام آباد (اُردو پوائنٹ اخبارتازہ ترین - این این آئی۔ 19 فروری2020ء) پی اے سی کی ذیلی کمیٹی کے کنوینئر نے چیئرمین نیب کی عدم موجودگی پر برہمی کا اظہار کرتے ہوئے چیئرمین نیب کو ہر حال میں پیش ہونے کا حکم دے دیا۔ گزشتہ روز کو پبلک اکاؤنٹس کمیٹی (پی اے سی) کی ذیلی کمیٹی کا اجلاس کنوینئر نورعالم خان کی زیر صدارت ہوا، اجلاس میں نیب کی جانب سے چیف فنانشل آفیسر شریک ہوئے تاہم چیئرمین قومی احتساب بیورو (نیب) جسٹس ریٹائرڈ جاوید اقبال کی عدم شرکت پر نورعالم خان نے برہمی کا اظہار کیا۔

نجی ٹی وی کے مطابق ذیلی کمیٹی کے کنوینئر نور عالم خان نے کہا کہ چیئرمین نیب کو بلایا تھا وہ کیوں نہیں آئے کیا چیئرمین نیب کو کمیٹی اجلاس میں بلانے کے لیے پولیس بھیجی جائے اور اگر پولیس چیئرمین نیب سے خوفزدہ ہے تو پھر فوج کو بھیجیں گے۔

(جاری ہے)

انہوں نے کہا کہ کوئی بھی شخص قانون سے بالاتر نہیں ہے،چاہے ہم پر جتنے مرضی مقدمات بنائیں چیئرمین نیب جسٹس (ر) جاوید اقبال کو کمیٹی میں پیش ہونا ہی پڑے گا۔

مسلم لیگ ن کے رہنما اور کمیٹی کے رکن خواجہ محمد آصف نے کہا کہ میں نیب کی تحقیقات بھگت رہا ہوں اس لیے میں اس کمیٹی میں بیٹھنا نہیں چاہتا تھا لیکن کورم پورا کرنے کے لیے مجھے بیٹھنا پڑ گیا تاہم میری موجودگی نیب کے حوالے سے کارروائی پر اثرانداز نہیں ہو گی۔خواجہ محمد آصف نے کنوینئر کمیٹی نور عالم خان کو تجویز دی کہ جو نیب حکام آئے ہیں انہیں سن لیں لیکن کنوینئر کمیٹی نے چیئرمین نیب کے بغیر کارروائی آگے بڑھانے سے انکار کر دیا اور ذیلی کمیٹی کے اجلاس کی کارروائی ختم کر دی۔