بلیک لسٹ ہونے کا خطرہ ٹل گیا، پاکستان کے ایف اے ٹی ایف سے مذاکرات مکمل

اعلامیہ جمعہ کو جاری کیا جائے گا، 13 کارکردگی اہداف پر جون 2020 میں دوبارہ جائزہ لیا جائے گا ۔ ذرائع وزارت خزانہ

سلمان جاوید بھٹی جمعرات 20 فروری 2020 16:36

اسلام آباد (اردو پوائنٹ اخبار تازہ ترین 20 فروی 2020ء ) بلیک لسٹ ہونے کا خطرہ ٹل گیا پاکستان کے ایف اے ٹی ایف سے مذاکرات مکمل ہو گئے ۔ نجی ٹی وی چینل کی رپورٹ کے مطابق وزارت خزانہ کی جانب سے بتایا گیا ہے کہ پاکستان کا بلیک لسٹ میں جانے کا خطرہ ٹل گیا ہے۔ باضابطہ اعلامیہ جمعہ کو جاری کیا جائے گا۔ ذرائع کے مطابق وزارت خزانہ کا کہنا 13 کارکردگی اہداف پر جون 2020 میں دوبارہ جائزہ لیا جائے گا۔

جبکہ حتمی جائزہ ستمبر 2020 تک مکمل کرنے کی ڈیڈ لائن دی جائے گی۔ پیرس میں جاری اجلاس کے دوران پاکستان کی جانب سے پیش کردہ رپورٹ کا جائزہ لیا گیا ۔پاکستانی حکام نے اجلاس کے شرکا کو دہشتگردوں کی مالی معاونت کرنے والوں کے خلاف کی گئی کارروائی سے آگاہ کیا اور بتایا کہ فنڈنگ روکنے کے لیے تمام اہداف پر پیشرفت کی گئی ہے۔

(جاری ہے)

پاکستانی وفد نے اپنی بریفنگ میں بتایا کہ منی لانڈرنگ میں ملوث افراد پر جرمانہ دگنا کرنے کی قانون سازی آخری مراحل میں ہے جبکہ 27 ایف اے ٹی ایف کے اہداف میں سے 14 پر واضح پیشرفت کی ہے۔

منی لانڈرنگ میں ملوث افراد کی جائیدادیں ضبط کی جائیں گی۔ جبکہ مشکوک ٹرانزیکشن رپورٹ کا ڈیٹا 5 سال کی بجائے 10 سال تک رکھا جائے گا۔ اجلاس میں دہشت گردوں کی فنڈنگ روکنے کے لیے پاکستان کی حکمت عملی اور رپورٹ پر رکن ممالک نے اطمینان کا اظہار کیا۔ واضح رہے کہ گزشتہ ماہ ایف اے ٹی ایف حکام کے بیجنگ اجلاس میں پاکستان کو اس وقت بڑی کامیابی حاصل ہوئی تھی جب بھارت کی تمام تر سازشوں کے باوجود بیشتر ممالک نے پاکستان کی کارکردگی کو سراہا تھا۔

پاکستان ایف اے ٹی ایف کی جانب سے دیے گئے بیشتر ٹاسک پورے کرنے میں کامیاب رہا ہے، جس کے بعد اب پاکستان کا نام گرے لسٹ سے نکال دیے جانے کے واضح امکانات ظاہر کئے جا رہے تھے۔