پاکستان ریلوے کوئٹہ تفتان ریل ٹریک کو اپ گریڈ کرنے کے حوالہ سے فزیبلیٹی سٹڈی مکمل کر چکا ہے،

کوئٹہ تفتان ٹریک کی اپ گریڈیشن پر 112 ارب روپے خرچ ہوں گے، پراجیکٹ کی تکمیل سے پاکستان اور ایران کے درمیان مسافروں کی آمدورفت اور تجارت میں اضافہ ہو گا، سی پیک کے تحت ایم ایل ون منصوبے سے پاکستان میں ریل کا انقلاب آئے گا،وزیر ریلوے شیخ رشید احمد کی ایرانی سفیر سیّد محمد علی حسینی سے ملاقات میں گفتگو

منگل 11 اگست 2020 17:00

پاکستان ریلوے کوئٹہ تفتان ریل ٹریک کو اپ گریڈ کرنے کے حوالہ سے فزیبلیٹی سٹڈی مکمل کر چکا ہے،

اسلام آباد (اُردو پوائنٹ اخبارتازہ ترین - اے پی پی۔ 11 اگست2020ء) وزیر ریلوے شیخ رشید احمد سے پاکستان میں ایران کے سفیر سیّد محمد علی حسینی نے منگل کو یہاں ملاقات کی۔ ملاقات میں پاکستان اور ایران کے درمیان ریل کے شعبہ میں تعاون بڑھانے پر بات چیت کی گئی۔ اس موقع پر وزیر ریلوے شیخ رشید احمد نے کہا کہ پاکستان ریلوے کوئٹہ تفتان ریل ٹریک کو اپ گریڈ کرنے کے حوالہ سے فزیبلیٹی سٹڈی مکمل کر چکا ہے، کوئٹہ تفتان ٹریک کی اپ گریڈیشن پر 112 ارب روپے خرچ ہوں گے، پراجیکٹ کی تکمیل سے پاکستان اور ایران کے درمیان مسافروں کی آمدورفت اور تجارت میں اضافہ ہو گا۔

انہوں نے کہا کہ پاکستان اور چین کے درمیان سی پیک کے تحت منظور ہونے والے ایم ایل ون منصوبے سے پاکستان میں ریل کا انقلاب آئے گا۔

(جاری ہے)

انہوں نے کہا کہ خواہش ہے کہ سی پیک منصوبہ کے تحت پاکستان اور ایران کے درمیان ریل تعاون کو زیادہ تیزی سے آگے بڑھایا جائے۔ اس موقع پر گفتگو کرتے ہوئے ایرانی سفیر نے کہا کہ اکنامک کوورڈینیشن آرگنائزیشن (ای سی او) کے تحت پاکستان-ایران-ترکی فریٹ ٹرین کے حوالہ سے کوششوں کو تیز کرنے کی ضرورت ہے۔

پاکستان ریلوے اور ایران ریل کے درمیان شراکت داری کے باہمی منصوبوں میں تیزی لانے کے لئے چیئرمین ریلوے کی سربراہی میں کمیٹی قائم کر دی گئی ہے۔ ایرانی سفیر نے شیخ رشید احمد کو ایران کے وزیر ٹرانسپورٹ محمد اسلامی کا تہنیتی پیغام بھی پہنچایا۔ انہوں نے یوم آزادی پاکستان پر وزیر ریلوے کو پیشگی مبارکباد دی۔