پارک لین کیس، آصف زرداری کی احتساب عدالت میں ٹرائل فوری روکنے کی استدعا مسترد

المیہ ہی یہ ہے نیب مقدمات پر وقت پر فیصلہ ہی نہیں ہو پاتا، اسلام آباد ہائیکورٹ

منگل 19 جنوری 2021 17:15

پارک لین کیس، آصف زرداری کی احتساب عدالت میں ٹرائل فوری روکنے کی استدعا مسترد
اسلام آباد (اُردو پوائنٹ اخبارتازہ ترین - این این آئی۔ 19 جنوری2021ء) اسلام آباد ہائیکورٹ نے پارک لین کیس میں آصف زرداری کی احتساب عدالت میں ٹرائل فوری طور پر روکنے کی استدعا مسترد کردی۔پیر کو اسلام آباد ہائیکورٹ میں آصف علی زرداری کی پارک لین کیس میں نیب دائرہ اختیار کیخلاف درخواست پر سماعت ہوئی۔ ہائیکورٹ نے احتساب عدالت میں ٹرائل روکنے کی استدعا مسترد کردی۔

(جاری ہے)

وکیل فاروق نائیک نے استدعا کی کہ یہاں دائرہ اختیار چیلنج ہے، سپریم کورٹ میں مقدمات سندھ منتقل کرنے کی درخواستیں زیر التوا ہیں، درخواستوں پر فیصلے تک نیب کو احتساب عدالت میں شواہد ریکارڈ کرانے سے روکا جائے۔جسٹس عامر فاروق نے ریمارکس دیئے کہ شواہد ریکارڈ ہونے دیں نیب نے کون سا 30 دن میں فیصلہ ہی کروا لینا ہے، المیہ ہی یہ ہے نیب مقدمات پر وقت پر فیصلہ ہی نہیں ہو پاتا۔نیب پراسیکیوٹر سردار مظفر عباسی نے کہا کہ ہم نے ایک کیس میں دس گواہان کے بیانات کرادیے لیکن یہ وکیل جرح ہی نہیں کر رہے، دائرہ اختیار سے متعلق بلال شیخ کی درخواست بھی آصف زرداری کیساتھ مقرر کی جائے۔عدالت نے درخواستیں ایک ساتھ مقرر کرنے کی ہدایت کرتے ہوئے سماعت 11 فروری تک ملتوی کردی۔

اسلام آباد میں شائع ہونے والی مزید خبریں