محصولات میں گزشتہ مالی سال کے مقابلے میں41 فیصد اضافہ ہوا، چیئرمین ایف بی آر

درآمدات بڑھنے سے کسٹم ڈیوٹی 47 فیصد بڑھی ہے، درآمدات بڑھنے سے ٹیکس آمدن بڑھنا خوش آئند نہیں تشویش ناک ہے، قائمہ کمیٹی کو بریفنگ

جمعرات 23 ستمبر 2021 00:01

اسلام آباد (اُردو پوائنٹ اخبارتازہ ترین - این این آئی۔ 22 ستمبر2021ء) چیئرمین فیڈرل بورڈ آف ریونیو(ایف بی آر) اشفاق احمد نے قومی اسمبلی کی قائمہ کمیٹی برائے خزانہ کو بتایا ہے کہ محصولات میں گزشتہ مالی سال کے مقابلے میں41 فیصد اضافہ ہوا ہے۔فیض اللہ کموکا کی زیرصدارت قومی اسمبلی کی قائمہ کمیٹی برائے خزانہ کا اجلاس ہوا، چیئرمین ایف بی آر نے بریفنگ میں بتایا کہ محصولات میں گزشتہ مالی سال کے مقابلے میں41 فیصد اضافہ ہوا ہے۔

(جاری ہے)

چیئرمین ایف بی آر نے بتایا کہ محصولات میں اضافے کے ساتھ ٹیکس نظام میں بہتری آئی ہے، 323 ارب روپے سے زائد کے انکم ٹیکس ریفنڈز کی ادائیگی باقی ہے، 181 ارب روپے سیلزٹیکس ریفنڈزصنعتوں کی پیداوارمیں اضافے کیلئے جاری کیے۔مسلم لیگ (ن) کی رکن عائشہ غوث پاشا نے کہا کہ اس وقت جو ہو رہا ہے وہ سب اچھا نہیں ہو رہا۔ چیئرمین ایف بی آر نے بتایا کہ ان کا کام پالیسی بنانا نہیں بلکہ پالیسی پرعمل درآمد کرانا ہے۔ عائشہ غوث پاشا نے کہا کہ درآمدات بڑھنے سے کسٹم ڈیوٹی 47 فیصد بڑھی ہے، درآمدات بڑھنے سے ٹیکس آمدن بڑھنا خوش آئند نہیں تشویش ناک ہے۔