ڈی جی آئی ایس آئی کی وزیراعظم کے ہمراہ سعودی عرب روانگی کی اطلاعات بے بنیاد قرار

ڈی جی آئی ایس آئی لیفٹیننٹ جنرل فیض حمید پاکستان میں موجود ہیں۔ ذرائع

Sumaira Faqir Hussain سمیرا فقیرحسین ہفتہ 23 اکتوبر 2021 14:12

ڈی جی آئی ایس آئی کی وزیراعظم کے ہمراہ سعودی عرب روانگی کی اطلاعات بے بنیاد قرار
اسلام آباد (اُردو پوائنٹ تازہ ترین اخبار۔ 23 اکتوبر 2021ء) : ڈی جی آئی ایس آئی لیفٹیننٹ جنرل فیض حمید کی سعودی عرب روانگی کی اطلاعات کو بے بنیاد قرار دے دیا گیا۔ تفصیلات کے مطابق میڈیا ذرائع کا کہنا ہے کہ ڈی جی آئی ایس آئی لیفٹیننٹ جنرل فیض حمید کی وزیراعظم عمران خان کے ہمراہ سعودی عرب روانگی کی اطلاعات بے بنیاد ہیں۔ ذرائع نے کہا کہ ڈی جی آئی ایس آئی لیفٹیننٹ جنرل فیض حمید اس وقت پاکستان میں موجود ہیں۔

واضح رہے کہ آج وزیرِ اعظم عمران خان سعودی ولی عہد شہزادہ محمد بن سلمان کی دعوت پر سعودی عرب کے تین روزہ دورے پر روانہ ہوئے۔ اس موقع پر وزیر خارجہ شاہ محمود قریشی، وزیر توانائی حماد اظہر اور معاون خصوصی برائے ماحولیاتی تبدیلی ملک امین اسلم بھی وزیر اعظم کے ہمراہ ہیں۔

(جاری ہے)

دورہ سعودی عرب کے دوران وزیراعظم عمران خان مشرق وسطیٰ گرین انیشی ایٹیو سربراہ اجلاس کی افتتاحی تقریب میں شرکت کریں گے جہاں وہ ماحولیاتی تبدیلیوں کی وجہ سے ترقی پذیر ممالک کو درپیش مسائل پر نقطہ نظر پیش کریں گے۔

وزیراعظم ماحولیاتی چیلنجز سے نمٹنے کیلئے فطری حل سے متعلق پاکستان کے تجربات کو بھی اجاگر کریں گے۔ یہ سربراہ اجلاس ولی عہد شہزادہ محمد بن سلمان بن عبدالعزیز کا اقدام ہے۔ مشرق وسطیٰ خطہ کے حوالہ سے اس قسم کا یہ پہلا اجلاس ہے، وزیراعظم عمران خان سعودی قیادت کے ساتھ دوطرفہ بات چیت کریں گے جن میں سعودی عرب میں پاکستانیوں کی فلاح و بہبود، پاکستانی محنت کشوں کیلئے مزید مواقع پیدا کرنے، معاشی اور تجارتی تعلقات پر پیشرفت پر توجہ مرکوز کی جائے گی۔

فریقین علاقائی اور بین الاقوامی امور کے بارے میں باہمی دلچسپی کے امور پر بھی تبادلہ خیال کریں گے۔ وزیراعظم عمران خان دورہ کے دوران پاکستان میں سرمایہ کاری کے فروغ کے حوالہ سے تقریب میں بھی شرکت کریں گے۔ سعودی عرب میں پاکستانی برادری سے تعلق رکھنے والے ممتاز سرمایہ کاروں اور کاروباری شخصیات سے بھی بات چیت کریں گے۔ پاکستان اور سعودی عرب کے درمیان تاریخی برادرانہ، مشترکہ عقیدے، تاریخی اور باہمی تعاون پر مبنی تعلقات ہیں۔

سعودی عرب میں 20 لاکھ سے زائد پاکستانی مقیم ہیں جو کہ دونوں ممالک کی ترقی و خوشحالی میں اہم کردار ادا کر رہے ہیں۔ دونوں ممالک کے درمیان تعلقات جموں و کشمیر سے متعلق او آئی سی رابطہ گروپ سمیت مسلسل اعلیٰ سطحی رابطوں، مختلف شعبوں میں قریبی تعاون، علاقائی و بین الاقوامی امور پر باہمی تعاون پر مبنی ہیں۔ وزیراعظم عمران خان کے دورہ سے پاکستان اور سعودی عرب کے درمیان تعاون کو مزید فروغ ملے گا۔

اسلام آباد شہر میں شائع ہونے والی مزید خبریں:

Your Thoughts and Comments