حکومت نے بیرون ملک سفر کیلئے بوسٹر شاٹ کی فیس ختم کردی

بیرون ملک سفر کرنے والے مسافر دستاویزات دکھا کر مفت بوسٹرخوراک لگوا سکیں گے۔ وزارت صحت

Sanaullah Nagra ثنااللہ ناگرہ ہفتہ 22 جنوری 2022 16:15

حکومت نے بیرون ملک سفر کیلئے بوسٹر شاٹ کی فیس ختم کردی
اسلام آباد (اردوپوائنٹ اخبارتازہ ترین۔ 22 جنوری 2022ء) وفاقی حکومت نے بیرون ملک سفر کیلئے بوسٹر شاٹ کی فیس ختم کردی، بیرون ملک سفر کرنے والے مسافر دستاویزات دکھا کر مفت بوسٹرخوراک لگوا سکیں گے۔ جیو نیوز کے مطابق وفاقی وزارت صحت نے بیرون ملک سفر کرنے والے شہریوں کیلئے کورونا ویکسین کی بوسٹرشاٹ کی فیس ختم کردی ہے، وزارت صحت نے اس کا نوٹیفکیشن بھی جاری کردیا ہے۔

نوٹیفکیشن میں کہا گیا کہ عام عوام کیلئے ملک میں پہلے ہی بوسٹرخوراک مفت ہے، جبکہ اب بیرون ملک سفر کرنے والے شہری اب اپنی سفری دستاویزات دکھا کر مفت بوسٹر لگوا سکیں گے۔ واضح رہے گزشتہ روز این سی اوسی نے کورونا کے زیادہ شرح والے تعلیمی ادارے ایک ہفتے کیلئے بند کرنے کا فیصلہ کیا ہے۔این سی اوسی اجلاس میں فیصلہ کیا گیا کہ ڈیٹا سے ویکسی نیشن لیول اور انفیکشن ریٹ کا تعلق سامنے آیا ہے، ضلعی انتظامیہ ، صوبائی اور محکمہ صحت کے حکام سے ملکر تعلیمی اداروں کی بندش کا تعین کرے گی۔

(جاری ہے)

این سی اوسی نے ہدایت کی ہے کہ اومی کرون سے متاثرہ شہروں کے تعلیمی اداروں میں آئندہ دو ہفتوں میں کورونا ٹیسٹنگ کی جائے ، وفاق کی اکائیاں 12سال سے زائد عمر طلباء کی ویکسی نیشن کیلئے خصوصی مہم چلائیں گی۔ 12سال سے زائد عمر طلباء کی ویکسی نیشن 100 فیصد یقینی بنائی جائے گی۔ دوسری جانب پاکستان کورونا مریضوں کے حوالے سے مرتب کی گئی فہرست میں 42 ویں نمبر پر آگیا،6540نئے کیسز رپورٹ ،شرح 11 فیصد سے زائد ہوگئی ، چوبیس گھنٹوں میں مزید بارہ افراد چل بسے ،1119مریض شفایاب ہوگئے۔

نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 6 ہزار 540 کیسز سامنے آئے ہیں، مزید 12 مریض اس موذی وباء کے سامنے زندگی کی بازی ہار گئے، اس کے مزید 1 ہزار 119 مریض شفایاب ہو گئے، مثبت کیسز کی شرح 11 اعشاریہ 10 فیصد پر آ گئی۔پاکستان بھر میں اب تک 29 ہزار 77 کورونا وائرس کے مریض انتقال کر چکے ہیں جبکہ اس موذی وائرس کے کل مریضوں کی تعداد 13 لاکھ 60 ہزار 19 ہو چکی ہے۔

ملک بھر میں ہسپتالوں، قرنطینہ سینٹرز، وینٹی لیٹرز اور گھروں میں کورونا وائرس کے 63 ہزار 344 زیرِ علاج مریضوں میں سے 1 ہزار 55 کی حالت تشویش ناک ہے، جبکہ 12 لاکھ 67 ہزار 598 مریض اب تک اس بیماری سے شفایاب ہو چکے ہیں۔گزشتہ 24 گھنٹوں میں ملک میں کورونا وائرس کے مزید 58 ہزار 902 ٹیسٹ کیئے گئے، جبکہ اب تک کٴْل 2 کروڑ 44 لاکھ 74 ہزار 618 کورونا ٹیسٹ کیئے جا چکے ہیں۔پاکستان بھر میں اب تک کل 17 کروڑ 7 لاکھ 11 ہزار 868 کورونا ویکسین کی خوراکیں دی جا چکی ہیں جبکہ 7 کروڑ 88 لاکھ 60 ہزار 543 افراد کی مکمل ویکسینیشن ہو چکی ہے۔

اسلام آباد شہر میں شائع ہونے والی مزید خبریں:

Your Thoughts and Comments