مل کر کام کرکے ہم زمین کے انحطاط کا مقابلہ کر سکتے ہیں ، وزیر اعظم کاپیغام

پیر 17 جون 2024 19:30

اسلام آباد (اُردو پوائنٹ اخبارتازہ ترین - اے پی پی۔ 17 جون2024ء) وزیر اعظم محمد شہباز شریف نے کہا ہے کہ مل کر کام کرکے ہم زمین کے انحطاط کا مقابلہ کر سکتے ہیں اور ایک پائیدار اور لچکدار پاکستان کی تعمیر کر سکتے ہیں، صحرا اور خشک سالی سے نمٹنے کے عالمی دن2024 کے موقع پر ہم ''زمین کے لئے متحد'' کے موضوع کے تحت زمین کی دیکھ بھال کی اہمیت ہمارا ورثہ ،ہمارا مستقبل ہے پر زور دینے کے لئے اکٹھے ہیں ، یہ دن ہمیں موجودہ اور آنے والی نسلوں کی فلاح و بہبود کے لئے اپنی زمین کی حفاظت اور بحالی کی ہماری اجتماعی ذمہ داری کی یاد دلاتا ہے۔

وزیر اعظم آفس کے میڈیا ونگ سے جاری بیان کے مطابق ان خیالات کا اظہار وزیر اعظم محمد شہباز شریف نے صحرا ئوں اور خشک سالی کےخاتمہ کے دن کے موقع پر اپنے پیغام میں کیا جو 17 جون 2024 کو منایا جا رہا ہے۔

(جاری ہے)

وزیر اعظم نے کہا کہ پاکستان میں، ریگستان، زمین کا انحطاط اور خشک سالی اہم چیلنجز ہیں جو لاکھوں زندگیوں کو متاثر کرتے ہیں، ہماری حکومت پائیدار زمین کے انتظام کے طریقہ، جنگلات کی بحالی کے پروگراموں اور جدید زرعی تکنیکوں کے ذریعے ان مسائل کو حل کرنے کے لئے پر عزم ہے۔

وزیر اعظم نے کہا کہ صرف حکومتی اقدامات کافی نہیں، ہمیں تمام اسٹیک ہولڈرز یعنی کمیونٹیز، سول سوسائٹی، نجی شعبے اور بین الاقوامی شراکت داروں کو شامل کرتے ہوئے ایک مشترکہ نقطہ نظر کو فروغ دینا ہوگا۔ مل کر کام کرکے ہم زمین کے انحطاط کا مقابلہ کر سکتے ہیں اور ایک پائیدار اور لچکدار پاکستان کی تعمیر کر سکتے ہیں۔صحرائیت اور خشک سالی سے بچائو کے دن کے موقع پر ہم اپنی زمین کے تحفظ کے لئے متحد ہونے کا عہد کریں اور اس بات کو یقینی بنائیں کہ یہ ہمارے ورثہ اور مستقبل کے لئے ایک اہم وسیلہ رہے۔ واضح رہے کہ یہ دن منانے کامقصد زرخیز زمینوں کو بنجر صحرائوں میں تبدیل ہونے سے روکنا ہے۔

اسلام آباد میں شائع ہونے والی مزید خبریں