پاکستانی پاسپورٹ مزید تنزلی کا شکار،عالمی رینکنگ میں 102ویں نمبر پر آ گیا

اسلام آباد(اردوپوائنٹ اخبار تازہ ترین۔ 13نومبر 2024) پاکستانی پاسپورٹ مزید تنزلی کا شکار ہوگیا،عالمی رینکنگ میں102ویں نمبر پر آگیا،گرین پاسپورٹ مسلسل گراوٹ کا شکار ہونے لگا، پاسپورٹ کی رینکنگ کرنے والے عالمی ادارے ہینلے اینڈ پارٹنرز کی حالیہ رپورٹ میں صومالیہ، یمن، بنگلہ دیش، فلسطین اتھارٹی، ایتھوپیا اور لیبیا جیسے ممالک کا پاسپورٹ بھی پاکستان سے بہتر قرار پایا جنہیں101 ویں نمبر پر رکھا گیا۔

پاکستانی پاسپورٹ رکھنے والے صرف 34 ممالک کا سفر بغیر ویزا کر پاتے ہیں۔ اس طرح پاکستانی پاسپورٹ کی عالمی رینکنگ میں گزشتہ سال کے مقابلے میں مزید کمی آئی ہے۔ 2023 کی رپورٹ میں پاکستان کو کمزور ترین پاسپورٹ رکھنے والے ممالک میں شامل کیا گیا ہے، جب کہ گزشتہ سال پاکستان 92 ویں نمبر پر تھا جو اب مزید نیچے 102 ویں نمبر پر آ گیا ہے۔

(جاری ہے)

رپورٹ کے مطابق دنیا میں سب سے کمزور پاسپورٹ افغانستان کا ہے۔

افغانستان کے شہری 28 ممالک کا سفر بغیر ویزا کر سکتے ہیں۔رپورٹ کے مطابق سنگاپور کے پاسپورٹ کو دنیا کا طاقتور ترین پاسپورٹ قرار دیا گیا ہے جس کے شہری 195 ممالک کا سفر بغیر ویزا کر سکتے ہیںجبکہ دوسرے نمبر پر فرانس، جرمنی، اٹلی، جاپان اور سپین ہیں جن کے شہریوں کو 192 ممالک کا سفر بغیر ویزا رسائی حاصل ہے۔ پاسپورٹ انڈیکس میں تیسرے نمبر پر 7 ممالک ہیں جن میں آسٹریا، فن لینڈ، آئرلینڈ، لکسمبرگ، نیدرلینڈز، جنوبی کوریا اور سوئیڈن شامل ہیں جن کے شہری 191ممالک کا سفر بغیر ویزا کرسکتے ہیں۔

اس رینکنگ میں برطانیہ، بلجیم، ڈنمارک، نیوزی لینڈ، ناروے اور سوئٹزرلینڈ چوتھے نمبر پر ہیں اور ان ممالک کے شہری 190ممالک کا سفر بغیر ویزا کرسکتے ہیں۔ پانچویں نمبر پر آسٹریلیا اور پرتگال ہیں جن کے پاسپورٹ کے حامل شہری 188 ممالک کا سفر بغیر ویزا کرسکتے ہیں۔اسی طرح چھٹے نمبر پر یونان اور پولینڈ ہیں جبکہ ساتویں نمبر پر کینیڈا، ہنگری اور مالٹا ہیں جنکے شہری بالترتیب 184 اور 182 ممالک کا سفر بغیر ویزا کرسکتے ہیں۔

انڈیکس میں امریکی پاسپورٹ آٹھویں پوزیشن پر ہے اور امریکی شہری 180 ممالک کا سفر بغیر ویزا کرسکتے ہیں۔ گزشتہ سال ہینلے اینڈ پارٹنرز کی جاری کردہ رپورٹ میں پاکستان کمزور ترین پاسپورٹ رکھنے والا چوتھا ملک قرار پایا تھا اور یمن اور صومالیہ کے ساتھ مشترکہ طور پر 92 ویں نمبر پر تھا جو اس سال مزید گرکر 102 نمبر پر آگیا ہے۔