پی ٹی آئی آزاد کشمیرکا آئندہ سال عام انتخابات میں بغیراجازت امیدوار ہونے کا اعلان کرنے والوں کے خلاف تادیبی کارروائی کا فیصلہ

جمعرات 4 جون 2020 16:31

اسلام آباد (اُردو پوائنٹ اخبارتازہ ترین - اے پی پی۔ 04 جون2020ء) تحریک انصاف آزاد کشمیر نے آزاد کشمیر میں آئندہ سال ہونے والے عام انتخابات میں پارٹی کی اجازت کے بغیر اسمبلی کا امیدوار ہونے کا اعلان کرنے والوں کے خلاف تادیبی کارروائی کا فیصلہ کیا ہے جس کا نوٹیفکشن جاری کر دیا گیا۔

(جاری ہے)

مرکزی سیکرٹری اطلاعات پاکستان تحریک انصاف آزادکشمیر ارشاد محمود نے کہا ہے کہ پاکستان تحریک انصاف کے چیف آرگنائزر سیف اللہ خان نیازی نے پی ٹی آئی کے کارکناں کو ہدایت کی ہے کہ وہ سوشل یا پرنٹ میڈیا کے ذریعے اپنے آپ کو یا کسی بھی دوسرے شخص کو اسمبلی کا نامزد امیدوار لکھنا یا کہلانا بند کردیں۔

انہوں نے کہا ہے کہ پارٹی کی اجازت اور پراسیس کے بغیر اسمبلی الیکشن کے لیے پارٹی امیدوار بننا پارٹی آئین کی خلاف ورزی ہے۔ نوٹیفکشن میں کہا گیا ہے کہ یہ سرکلر ایسے تمام افراد کے لئے یاد دہانی اور آخری انتباہ ہے جو جان بوجھ کر ایسا کررہے ہیں۔ نوٹیفکشن میں ہدایت کی گئی ہے کہ ایسے عناصر اس سرکلر کے جاری ہونے کے بعد سوشل یا پرنٹ میڈیا پر پارٹی کا ٹکٹ ہولڈر ہونے کا تاثر نہ دیں۔ بصورت دیگر ان کے خلاف آئین کے مطابق نظم وضبط کی خلاف ورزی پر کارروائی کی جائے گی۔