سلامتی کونسل میں کشمیر کے لئے ایک بار پھر بھٹو کی آواز گونج اٹھی:چوہدری محمد یاسین

ہفتہ 21 مئی 2022 22:56

اسلام آباد (اُردو پوائنٹ اخبارتازہ ترین - آن لائن۔ 21 مئی2022ء) پاکستان پیپلزپارٹی آزاد کشمیر کے صدر چوہدری یاسین نے کہا ہے کہ سلامتی کونسل میں کشمیر کے لئے ایک بار پھر بھٹو کی آواز گونج اٹھی۔ وزیر خارجہ بلاول بھٹو زرداری نے اپنے عظیم نانا اور عظیم والدہ کی یاد تازہ کر دی ہے۔ میڈیا آفس سے جاری ہونے والے ایک بیان میں چوہدری یاسین نے کہا کہ سلامتی کونسل میں چیئرمین بلاول بھٹو زرداری کا خطاب کشمیری عوام کے دل کی آواز ہے۔

(جاری ہے)

بلاول بھٹو زرداری نے مقبوضہ کشمیر میں بھارتی بربریت کے خلاف موثر آواز اٹھائی۔ چوہدری یاسین نے کہا کہ کشمیری عوام کو رائے شماری کا حق دینے سے اس خطے میں امن بھی بحال ہوگا اور خوشحالی بھی آئے گی۔ انہوں نے کہا کہ سابق حکومت نے مقبوضہ کشمیر کے عوام کو مودی کے رحم و کرم پر چھوڑ دیا تھا اور مودی نے مقبوضہ کشمیر کو جیل بنا دیا تھا۔ چوہدری یاسین نے کہا کہ چیئرمین پیپلزپارٹی اور وزیر خارجہ بلاول بھٹو زرداری کی کشمیر کے بارے میں پالیسی بالکل واضح ہے جس کااظہار انہوں نے سلامتی کونسل کے اجلاس میں بھی کیا۔