ہم پوری ریاست جموں و کشمیر کی آزادی اور الحاق پاکستان کے لیے جدوجہد کر رہے ہیں، غلام محمد صفی

ریاست کے کسی ایک خطے کو الگ کر کے نہیں دیکھا جا سکتا، کنونئیر کل جماعتی حریت کانفرنس آزاد کشمیر

منگل 13 فروری 2018 20:14

اسلام آباد (اُردو پوائنٹ اخبارتازہ ترین - آن لائن۔ 13 فروری2018ء) کل جماعتی حریت کانفرنس آزاد کشمیر پاکستان شاخ کے کنوینر غلام محمد صفی نے کہا ہے کہ ہم پوری ریاست جموں و کشمیر کی آزادی اور الحاق پاکستان کے لیے جدوجہد کر رہے ہیں ریاست کے کسی ایک خطے کو الگ کر کے نہیں دیکھا جا سکتا انہوں نے کہا کہ حریت کانفرنس سے منسوب یہ بات غلط ہے کہ حریت کانفرنس نے گلگت بلتستان کو پاکستان کا صوبہ بنانے کی حمایت کی ہے خبر رساں ادارے سے بات چیت کرتے ہوئے غلام محمد صفی نے کہا کہ مقبوضہ کشمیر میں آزادی کی جدوجہد جاری ہے نہتے شہری مارے جا رہے ہیں آزادی پسند قیادت پوری ریاست کے حقوق کی جدوجہد کر رہی ہے جب ان سے پوچھا گیا کہ حریت کانفرنس آزاد کشمیر شاخ کے ترجمان عبدالحمید لون کا بیان اخبارات میں شائع ہوا ہے جس میں انہوں نے گلگت بلتستان کو پاکستان کا صوبہ بنانے کی حمایت کی ہے کیا حریت کانفرنس نے اپنی پالیسی تبدیل کر دی ہی غلام محمد صفی نے کہا کہ حریت پالیسی میں کوئی تبدیلی واقع نہیں ہوئی ہم سمجھتے ہیں کہ پوری ریاست پاکستان کا حصہ بنے جو بیان شائع ہوا ہے وہ درست نہیں ہے اور نہ ہی حریت کانفرنس کی پالیسی ہے۔