اسلام آباد سے خواتین کیلئے مخصوص نشستیں نہ ہونے پر اسلام آباد ہائی کورٹ میں درخواست دائر

جمعرات 19 جولائی 2018 21:54

اسلام آباد (اُردو پوائنٹ اخبارتازہ ترین - این این آئی۔ 19 جولائی2018ء) اسلام آباد سے خواتین کیلئے مخصوص نشستیں نہ ہونے پر اسلام آباد ہائیکورٹ میں درخواست دائر کر دی گئی ہے ۔جمعرات کو آمنہ صدف،فرخندہ کوکب اور صبا افضل نے مخصوص نشستیں نہ ہونے پر عدالت سے رجوع کیا۔

(جاری ہے)

دائر درخواست میں موقف اختیار کیا گیا ہے کہ تمام صوبوں میں خواتین کا کوٹہ مخصوص ہے لیکن اسلام آباد میں خواتین کی مخصوص نشست نہیں ہیں ،باقی صوبوں کی طرح وفاقی دارالحکومت کو بھی خواتین کو مخصوص نشستیں دینی چاہئیں ،عدالت فریقین کو آنے والی اسمبلی میں خواتین کیلئے مخصوص نشستوں کا کوٹہ رکھنے کی ہدایت جاری کرے ،پنجاب میں خواتین کیلئے 33 ،جبکہ سندھ میں خواتین کیلئے 14 نشستیں مختص ہیں۔

خیبرپختونخوا میں خواتین کیلئے 9 ،بلوچستان میں صرف 4 نشستیں مختص ہیں جبکہ وفاقی دارالحکومت اسلام آباد میں خواتین کیلئے ایک بھی نشست مختص نہیں ہے ۔دائر درخواست میں پرنسپل سیکرٹری صدر پاکستان ،پرنسپل سیکرٹری وزیراعظم ،سپیکر قومی اسمبلی، چیف الیکشن کمشنر اور سیکرٹری قانون سمیت دیگر کو فریق بنایا گیا ہے۔