حضرت امام حسین رضی اللہ عنہ نے اہل بیت اطہار رضی اللہ عنہما کے ہمراہ عظیم ترین قربانی دے کر نہ صرف ملت اسلامیہ بلکہ بنی نوع انسان کو حق و صداقت کیلئے ڈٹ جانے اور کسی مشکل، تکلیف، دکھ اور رنج و غم کو خاطر میں نہ لانے کا درس دیا ، رہنما مسلم لیگ(ق)

جمعرات 20 ستمبر 2018 20:47

اسلام آباد (اُردو پوائنٹ اخبارتازہ ترین - آن لائن۔ 20 ستمبر2018ء) پاکستان مسلم لیگ کے صدر و سابق وزیراعظم چودھری شجاعت حسین، سپیکر پنجاب اسمبلی چودھری پرویزالٰہی اور مونس الٰہی نے کہا ہے کہ نواسہ رسول، جگر گوشہ بتول رضی اللہ عنہا، حضرت امام حسین رضی اللہ عنہ نے اہل بیت اطہار رضی اللہ عنہما کے ہمراہ عظیم ترین قربانی دے کر نہ صرف ملت اسلامیہ بلکہ بنی نوع انسان کو حق و صداقت کیلئے ڈٹ جانے اور کسی مشکل، تکلیف، دکھ اور رنج و غم کو خاطر میں نہ لانے کا درس دیا ہے جو کہ پوری انسانیت کیلئے ہمیشہ مشعل راہ رہے گا۔

انہوں نے کہا کہ ہمیں بھی ملک و ملت کی سربلندی اور درپیش چیلنجز کے مقابلہ کیلئے شبیری رضی اللہ عنہ کردار اپنانا چاہئے کیونکہ سانحہ کربلا سے یہ درس بھی ملتا ہے کہ عظیم مقاصد کیلئے عظیم قربانی دینے والے زندہ و جاوید ہو جاتے ہیں۔

(جاری ہے)

یوم عاشور پر اپنے پیغامات میں انہوں نے مزید کہا کہ حضرت امام حسین رضی اللہ عنہ اور ان کے ساتھیوں نے ہمیں یہ سبق بھی دیا ہے کہ دشمن کی تعداد، قوت اور آلات حرب کو خاطر میں نہ لائیں، آج مسلمانوں باالخصوص ہر پاکستانی کا فرض بنتا ہے کہ وہ عظیم شہدائ کربلا کے کردار، ایثار و اتحاد کو مشعل راہ بنائے اور اپنے تمام فروعی و سیاسی اختلافات ختم کر کے اپنی صفوں میں مکمل اتحاد، نظم و ضبط اور رواداری و ایثار کا مظاہرہ کیا جائے اور اپنی تمام تر صلاحیتوں کو پاکستان کی سلامتی و یکجہتی کے تحفظ، بہتری، ترقی و خوشحالی اور غریب و عام آدمی کی فلاح و بہبود کیلئے بروئے کار لائیں کیونکہ حضرت امام حسین رضی اللہ عنہ اور ان کے عظیم المرتبہ ساتھیوں کے حضور خراج عقیدت پیش کرنے کا یہی سب سے بہترین طریقہ ہے کہ ہم ان کے عمل و اقوال کو مشعل راہ بنائیں۔

#۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔طارق ورک