پاکستان سینیٹ نے پارلیمانی سفارتکاری میں ایک اور سنگ میل عبور کر لیا

اسلام آباد (اُردو پوائنٹ اخبارتازہ ترین - این این آئی۔ 15 اکتوبر2018ء) پاکستان سینیٹ نے پارلیمانی سفارتکاری میں ایک اور سنگ میل عبور کر لیا ۔سینیٹر فاروق ایچ نائیک کو متفقہ طور پر بین الاقوامی پارلیمانی یونین کی اقوام متحدہ کے امورسے متعلق کمیٹی کا ممبر نامزد کر دیا گیا ہے ۔سابق چیئرمین سینیٹ کو بدھ18 اکتوبر 2018کو کمیٹی کی گورننگ کونسل کے جنیوا سو ئیٹز رلینڈ میں منعقد ہونے والے اجلاس میں باقاعدہ طور پر ممبر منتخب کر لیا جائے گااور وہ اقوام متحدہ کے امور سے متعلق کمیٹی کی نمائندگی کریں گے ۔

پاکستان کی جانب سے سینیٹر فاروق ایچ نائیک کو چیئرمین سینیٹ محمد صادق سنجرانی نے نامزد کیا جبکہ سپیکر قومی اسمبلی نے ان کی نامزدگی کی تائید کی ۔وہ اس سے قبل بھی اقوام متحدہ سے متعلق بین الاقوامی پارلیمانی یونین کے گروپ کے ممبر رہے اور ان کی کاوشوں سے دونوں اداروں کے مابین رابطہ کاری میں استحکام پیدا ہواجس کے نتیجے میں آئی پی یو کی اقوام متحدہ کے امور سے متعلق مستقل کمیٹی تشکیل دی گئی ۔

(جاری ہے)

کمیٹی کا مقصد ملکی اور بین الاقوامی سطح پر کیے گئے معاہدوں اور وعدوں پر عملدآمد یقینی بنا نے کیلئے کوشاں ارکان پارلیمنٹ کے لئے راہیں ہموار کرنا ہے ۔اس سلسلے میں ارکان پارلیمنٹ آپس میں گفت و شنید کے ذریعے معاملات کو آگے بڑھانے میں معاون ہوتے ہیں ۔ اس کمیٹی کو 18 رکنی بیورو کی خدمات حاصل ہوتی ہیں جو کہ اقوام متحدہ کے پائیدار ترقی ، امن ،بجٹ ، اصلاحات اور انسانی حقوق کے حوالے سے امور کی نگرانی میں معاونت کرتی ہے ۔

کمیٹی کا سال میں دو بار اجلاس ہوتا ہے ۔ سینیٹرز شمیم آفریدی ، شیر علی ارباب ایم این اے اور سیکرٹری جنرل سینیٹ امجد پرویز ملک نے جنیوا میں IPU کے سائیڈ لائنز پر ایشیائی پارلیمانی اسمبلی کے رابطہ کاری اجلاس میں پاکستان کی نمائندگی بھی کی ۔ اور رکن ممالک پر ایشیائی پارلیمانی اسمبلی کی سیاسی امور کی کمیٹی کے اجلاس میں شرکت کی دعوت بھی دی ۔ ترکی کی پارلیمان کے سپیکر اور اے پی اے کے صدر اور سیکرٹری جنرل نے پاکستان کے موثر کردار کو سراہا اور کاوشوں کی تعریف کی ۔