پاکستانی بینکوں پر ہیکرز کے حملوں پر شدید تشویش ہے ، ڈاکٹر مرتضی مغل

دس بینکوں نے کریڈٹ ، ڈیبٹ کارڈ کے زریعے بین الاقوامی لین دین کی سہولت ختم کر دی ہے، صدر پاکستان اکانومی واچ

ہفتہ 17 نومبر 2018 21:00

اسلام آباد (اُردو پوائنٹ اخبارتازہ ترین - آن لائن۔ 17 نومبر2018ء) پاکستان اکانومی واچ کے صدر ڈاکٹر مرتضیٰ مغل نے کہا ہے کہ پاکستانی بینکوں پر ہیکرز کے حملوں کے پیش نظر شدید تشویش لاحق ہے۔تفصیلات کے مطابق اپنے ایک بیان میں مرتضیٰ مغل کا کہنا تھا کہ دس بینکوں نے کریڈٹ اور ڈیبٹ کارڈ کے زریعے بین الاقوامی لین دین کی سہولت ختم کر دی ہے۔انہوں نے کہا کہ پاکستانی بینکوں پر ہیکرز کے حملوں اور بھاری نقصانات نے انٹرنیٹ بینکنگ کے نظام میں موجود کمزوریاں عیاں اور انٹرنیٹ سیکورٹی میں مزید سرمایہ کاری کی ضرورت واضع کر دی ہے۔

(جاری ہے)

ان کا کہنا تھا کہ دس بینکوں نے کریڈٹ اور ڈیبٹ کارڈ کے زریعے بین الاقوامی لین دین کی سہولت ختم کر دی ہے جو مسئلے کا حل نہیں کیونکہ اس سے صارفین کے مسائل میں اضافہ ہو گا۔صدر پاکستان اکانومی واچ نے بتایا کہ مرکزی بینک مالیاتی اداروں کو انٹرنیٹ سیکورٹی فول پروف بنانے کا پابند کرے جبکہ دیگر سرکاری اور نجی ادارے بھی اقدامات کریں تاکہ اہم ڈیٹا چوری ہونے سے بچایا جا سکے۔ڈاکٹر مرتضیٰ مغل نے زور دیا کہ سائبر سیکورٹی کے قوانین کو سخت کرنے کی ضرورت ہے، یہ جرم کسی ملک کی بین الاقوامی حدود کا پابند نہیں، اس لئے بین الاقوامی تعاون کے بغیر کامیابی ناممکن ہے۔۔