گزشتہ6ماہ کے معاشی اعدادو شمار حکومت کی اچھی کارکردگی اور درست سمت ظاہر کر رہے ہیں، ترجمان وزارت خزانہ

اسلام آباد ۔ (اُردو پوائنٹ اخبارتازہ ترین - اے پی پی۔ 19 جنوری2019ء) ترجمان وزارت خزانہ ڈاکٹر خاقان نجیب نے کہا ہے کہ گزشتہ6ماہ کے معاشی اعدادو شمار حکومت کی اچھی کارکردگی اور درست سمت ظاہر کر رہے ہیں ۔ہفتہ کو اے پی پی سے گفتگو کرتے ہوئے انہوں نے کہا کہ پہلی6ماہ کے دوران ترسیلات زرمیں10فیصد اضافہ ہواہے جبکہ دسمبر2018میں غیر ملکی سرمایہ کاری دسمبر2017کے مقابلے میں17 فیصد بڑھی ہے۔

انہوں نے کہا کہ چھ ماہ میں تجارتی خسارہ میں 5فیصد کمی ہوئی اور برآمدات میں دو فیصد اضافہ جبکہ درآمدات میں دو فیصد کمی ہوئی ہے۔انہوں نے کہا کہ 6 ماہ کے دوران حکومتی کوششوں کی بدولت کرنٹ اکائونٹ خسارہ میں گزشتہ سال کے اس عرصہ کے مقابلے میں 4.4 فیصد کمی آئی ہے اور ایکسٹرنل اکائونٹ پر بھی دبائو کم ہورہا ہے۔

(جاری ہے)

رواں مالی سال کے پہلی6 ماہ میں نجی شعبے کا قرضہ 494 ارب روپے تک پہنچ گیا ہے جو گزشتہ سال کے اس عرصے کے دوران232 ارب روپے تھا۔

ترجمان نے کہا کہ رواں مالی سال کے پہلی6 ماہ کے دوران زرعی شعبہ کے قرضے میں36 فیصد اضافہ ہوا اور یہ 212 ارب روپے تک پہنچ گیا۔ ایک سوال کے جواب میں ڈاکٹر خاقان نجیب نے کہا کہ حکومت23 جنوری کو انویسٹمنٹ اینڈ ایکسپورٹ انحانسمنٹ پیکج میں اسٹاک ایکسچینج ایف پی سی سی آئی اور دیگر چیمبرز کی تجاویز کو بھی شامل کیا گیا ہے۔ انہوں نے کہا کہ اس اصلاحاتی پیکج سے ملک کے غریب طبقہ کو زیادہ سے زیادہ ریلیف ملے گا۔ حکومت معیشت کے استحکام کیلئے ٹھوس اقدامات کررہی ہے اور ادائیگیوں کے توازن میں بھی بہتری آئی ہے۔