سی ڈی اے کے شعبہ انفورسمنٹ کا مختلف سیکٹروں میں غیر قانونی تعمیرات اور تجاوزات کے خلاف آپریشن جاری

جمعرات 12 دسمبر 2019 20:50

اسلام آباد ۔ (اُردو پوائنٹ اخبارتازہ ترین - اے پی پی۔ 12 دسمبر2019ء) وفاقی ترقیاتی ادارہ (سی ڈی ای) کے شعبہ انفورسمنٹ نے جمعرات کو اسلام آباد کے مختلف سیکٹروں میں غیر قانونی تعمیرات اور تجاوزات کے خلاف آپریشن جاری رکھا اور مختلف تجاوزات کے خاتمہ کے ساتھ غیر قانونی تعمیرات کو بھی گرا دیا۔ آپریشن کے دوران سیکٹر جی ایٹ فور میں سرکاری زمین پر بنائے گئے ایک غیرقانونی چھپر ہوٹل کو گرا نے کے علاوہ سیکٹر جی ایٹ ون میں سٹریٹ نمبر20 اورگلی نمبر 86 کے بالمقابل پبلک پارک میں سے بلڈنگ میٹریل کو بلڈوز کر دیا۔

اس ضمن میں ایک شخص کی طرف سے مزاحمت کرنے پر اس کے خلاف کار سرکار میں مداخلت کرنے پر تھانہ کراچی کمپنی میں درخواست برائے کارروائی دے کر ان کے حوالے کر دیا۔

(جاری ہے)

اسی طرح سیکٹر جی ٹین فور کی گلی نمبر 37میں ایک غیر قانونی تعمیر کئے گئے کمرہ کو بھی گرا دیا گیا جبکہ سیکٹر جی الیون اور ایف الیون کی درمیانی گرین بیلٹ نزد میرا آبادی پر ایک غیر قانونی دیوار کو بھی مسمار کر دیا گیا۔ دریں اثناء سیکٹر ایف 12 میں غیر قانونی طور پر بنائے گئے دو بھینسوں کے باڑے بھی گرا کر سرکاری زمین کو خالی کرایا گیا جبکہ سیکٹر ایف ٹین تھری سروس روڈ نزد گلی نمبر1 میں پلاٹ نمبر314 کے بالمقابل گرین بیلٹ پر بنایا گیا ایک عدد غیر قانونی کمرہ بھی گرا دیا گیا۔