حکومت سرمایہ داروں ، ذخیرہ اندوزوں اور عوام کی جیب کاٹنے والے مافیا کی محافظ بن گئی ہے،لیاقت بلوچ

اسلام آباد(اُردو پوائنٹ اخبارتازہ ترین - این این آئی۔ 25 نومبر2020ء) نائب امیر جماعت اسلامی اور سابق پارلیمانی لیڈر لیاقت بلوچ نے کہاہے کہ ملک کی معاشی صورتحال خطرناک ہوچکی ہے ۔ حکومت سرمایہ داروں ، ذخیرہ اندوزوں اور عوام کی جیب کاٹنے والے مافیا کی محافظ بن گئی ہے ۔ عوام کے لیے گندم ، آٹا ، چینی ، چاول ، چکن ، ٹماٹر ، ادرک ، انڈے ، خوردنی تیل ، آلو، لہسن پیاز کی قیمتوں میں اضافہ کی رفتار ناقابل برداشت ہوگئی ہے ۔

وزیراعظم عمران خان جس اقتصادی بہتری کے دعوے کر رہے ہیں ، وہ اونچے درجے کی ایلیٹ کلاس کی خوشحالی ہے ۔ غریب ، متوسط طبقہ ، تنخواہ دار اور پنشنرز کے لیے زندگی گزارنا ناممکن ہوگیا ۔ مہنگی بجلی ، گیس ، تیل پیداواری لاگت میں اضافہ کا باعث ہے جس سے مہنگائی ، بے روزگاری بڑھ رہی ہے ۔

(جاری ہے)

افراط زر سے عوام کی قوت خرید ختم ہو گئی ہے ۔ حکومت اور اپوزیشن قیادت کو عوام کی حالت زار سے کوئی سرکار نہیں ۔

جماعت اسلامی کی عوامی تحریک غریب ، مظلوم اور پسے ہوئے طبقہ کی آواز ہے ۔ لیاقت بلوچ نے آزاد جمو ں و کشمیر کے وفد سے ملاقات میں کہاکہ ریاست جموں و کشمیر کے عوام بھارت کے غیر قانونی ، غیر اخلاقی ، غیر انسانی اور ناجائز قبضے کا شکار ہیں ۔ بھارت کا غاصبانہ قبضہ عالمی اداروں اور عالمی قیادت، خصوصاً عالم اسلام کی بے حسی کی وجہ سے ہے ۔ مسئلہ کشمیر ہندوستان اور پاکستا ن کے دو طرفہ معاملہ تک محدود نہیں ۔

مسئلہ کشمیر کا تنازعہ عالمی سطح پر تسلیم شدہ اور اس کے اصل فریق ہیں ۔ دو طرفہ بات چیت پہلے بھی لاحاصل رہی اور اب بھی یہ لایعنی اور بے مقصد ہوگی ۔ہندوستان ، پاکستان اور کشمیری قیادت کے مابین سہ فریقی مذاکرات ہی مسئلہ کشمیر کا حل ہے ۔ کشمیری عوام اور قیادت کا اعتماد جنوبی ایشیا میں پائیدار امن و سکون کا واحد ذریعہ ہے ۔ 22 کروڑ پاکستانی کشمیری عوام کے پشتی بان ہیں ۔ کشمیریوں کی لازوال قربانیوں نے نئی نسل کو صدموں اور خون سے جوان و توانا بنادیاہے ۔ آزادی کے لیے جس قوم کو موت سے کوئی خطرہ نہ رہے ، اسے غلام نہیں رکھا جاسکتا ۔ جماعت اسلامی حکومت پر متفقہ قومی کشمیر پالیسی کے لیے دبائوبڑھائے گی ۔