اے این پی افغانستان سے امریکی انخلاء پر پریشان ہے،اسلم غوری

امریکہ کی تابعداری میں طالبان کو دہشتگرد نہیں کہا جا سکتا،افغانستان میں ہمیشہ مصالحت کی بات کی اے این پی کا فائدہ جنگ زدہ افغانستان میں ہے،جے یو آئی قیادت نے دہشتگردی کا مقابلہ کیا ہے،ترجمان جے یو آئی

منگل 27 جولائی 2021 16:37

اسلام آباد (اُردو پوائنٹ اخبارتازہ ترین - این این آئی۔ 27 جولائی2021ء) جے یو آئی (ف) کے ترجمان اسلم غوری نے کہا ہے کہ اے این پی افغانستان سے امریکی انخلاء پر پریشان ہے۔اپنے بیان میں اسلم غوری نے کہاکہ امریکہ کی تابعداری میں طالبان کو دہشتگرد نہیں کہا جا سکتا،افغانستان میں ہمیشہ مصالحت کی بات کی۔ انہوںنے کہاکہ اے این پی کا فائدہ جنگ زدہ افغانستان میں ہے،جے یو آئی قیادت نے دہشتگردی کا مقابلہ کیا ہے۔

انہوںنے کہاکہ اے این پی قیادت کی طرح حملوں سے خوف میں مبتلاء نہیں ہوئی۔ترجمان جے یو آئی نے کہاکہ پشتون قوم پر جب بھی کوئی حملہ آور ہوا ،اے این پی نے حمایت کی،عوامی طاقت سے محروم اب بیساکھیوں کی تلاش میں ہیں۔ترجمان جے یو آئی نے کہاکہ ایمل ولی عمران خان طرز کی سیاست ترک کر دیں۔

(جاری ہے)

اسلم غوری نے کہاکہ اے این پی ایمل ولی کو باچا خان کی زندگی سے روشناس کرائیں،بیرونی طاقتوں کے بل بوتے پر کی جانے والی سیاست عارضی ہوتی ہے۔

ترجمان جے یو آئی نے کہاکہ اے این پی وزیرستان میں جلسہ نہیں کرسکتی تو جے یو آئی وہاں مدد کر سکتی ہے۔ترجمان جے یو آئی نے کہاکہ جے یو آئی کے لاکھوں ورکر دہشت گردی اور آمریت کے خلاف میدان میں ہیں۔اسلم غوری نے کہاکہ فاٹا انضمام میں اے این پی قیادت نے گھناؤنا کردار ادا کیا۔انہوںنے کہاکہ پشتون قوم اسلام اور وطن کی وفادار ہے ، انہیں لسانیت کے نام پر گمراہ نہیں کیا جاسکتا۔انہوںنے کہاکہ عوام میں جانے سے گھبرانے والے محلاتی سازشوں والی سیاست کر رہے ہیں۔اسلم غوری نے کہاکہ اے این پی عمران خان کی طرح الزامات والی سیاست نہ کریں ،میدان میں آئیں اور مقابلہ کریں۔