اگر پی ٹی آئی آج اپنے کارکنوں کے ساتھ نہیں کھڑی تو کل عوام کے ساتھ کیسے کھڑی ہوگی، سینیٹر طلال چوہدری

اسلام آباد (اُردو پوائنٹ اخبارتازہ ترین - اے پی پی۔ 14 فروری2025ء) مسلم لیگ (ن) کے سینئر رہنما سینیٹر طلال چوہدری نے کہا ہے کہ پی ٹی آئی کے وکلاءنے ثابت کر دیا کہ ان کی وفاداری پارٹی کارکنوں کی بجائے صرف مالی مفادات سے جڑی ہے اور انہیں انصاف سے نہیں صرف پیسے سے دلچسپی ہے۔ جمعہ کو اپنے ایک بیان میں انہوں نے کہا کہ 69 مخلص کارکنوں کو قانونی ٹیم نے اس لئے چھوڑ دیا کیونکہ انہیں بھاری فیس نہیں دی گئی،مختلف مقدمات میں ملوث کارکنوں کو بے یارومددگار چھوڑ دینا یہ ثابت کرتا ہے کہ پی ٹی آئی کا قانونی ونگ اور آئی ایل ایف ان لوگوں کا ساتھ دینے کو تیار نہیں۔

انہوں نے کہا کہ پی ٹی آئی کارکن آج قانونی مدد سے محروم کر دیئے گئے۔ طلال چوہدری نے کہا کہ پی ٹی آئی قیادت خود سہولیات سے لطف اندوز ہو رہی ہے جبکہ اس کے کارکن مشکلات کا شکار ہیں، یہ پی ٹی آئی قیادت کا دوہرا معیار ہے،آئی ایل ایف کی جانب سے اپنے ہی کارکنوں کا دفاع نہ کرنا پی ٹی آئی کی اندرونی کرپشن اور منافقت کو بے نقاب کرتا ہے،انصاف اب صرف ان کے لئے ہے جو اس کی قیمت ادا کر سکتے ہیں، یہ پی ٹی آئی کے انصاف کا نعرہ ہے،آئی ایل ایف کارکنوں کے قانونی دفاع کے لئے بنایا گیا تھا جو آج خود ہی کارکنوں کا ساتھ چھوڑ چکا ہے۔

(جاری ہے)

پی ٹی آئی کے وکلاءاپنے مؤکلین کو کارکن نہیں بلکہ پیسہ کمانے کا ذریعہ سمجھتے ہیں۔ طلال چوہدری نے کہا کہ پارٹی کے لئے قربانیاں دینے والے کارکن آج اسی پارٹی کی بے حسی کا شکار ہو رہے ہیں، پی ٹی آئی کا انصاف کا نعرہ اس وقت کھوکھلا ثابت ہو جاتا ہے جب اس کے اپنے کارکن عدالتوں میں بے سہارا ہوتے ہیں، جب پیسہ بولتا ہے تو پی ٹی آئی کے وکلاءسنتے ہیں، وفاداری اور اصول ان کے لئے ثانوی حیثیت رکھتے ہیں۔ انہوں نے سوال اٹھایا کہ اگر پی ٹی آئی آج اپنے کارکنوں کے ساتھ نہیں کھڑی، تو کل یہ عوام کے ساتھ کیسے کھڑی ہوگی؟ ۔