عزیزمیاں قوال کو ہم سے بچھڑے 24 سال بیت گئے

اسلام آباد (اُردو پوائنٹ اخبارتازہ ترین - اے پی پی۔ 06 دسمبر2024ء) پرائیڈ آف پرفارمنس کے حامل عزیز میاں قوال کو ہم سے بچھڑے 24 سال بیت گئے تاہم ان کی قوالیوں کے لئے شاعری اور قوالی کے انداز کو اب تک پھر کوئی اور نہ اپنا سکا ۔ہر سال عزیز میاں قوال کی برسی 6دسمبر منائی جاتی ہے ۔ وہ 17اپریل 1942کو پید ا ہوئے۔ ان کا اصل نام عبدالعزیز تھا لیکن وہ عزیز میاں قوال کے نام سے مشہور ہوئے۔

عزیز میاں نے پنجاب یونیورسٹی لاہور سے ایم اے کی ڈگری حاصل کی اور قوالی کے شعبہ کا چناؤ کیا۔ عزیز میاں کو یہ اعزاز بھی حاصل تھا کہ انہوں نے اپنی گائی گئی زیادہ تر قوالیوں کی شاعری خود تخلیق کی۔ انہوں نے اللہ ہی جانے کون بشر ہے، یا نبیؐ یا نبیؐ، شرابی میں شرابی سمیت سینکڑوں قوالیاں گا ئیں ۔

(جاری ہے)

حکومت پاکستان کی جانب سےعزیز میاں کو 1989میں پرائیڈ آف پرفارمنس سے نوازا گیا ۔

عزیز میاں قوال اپنے منفرد انداز ، بھاری بھرکم آواز ، بارعب انداز گائیکی کے باعث پاکستان سمیت دنیا بھر کے کئی دیگر ممالک میں انتہائی عزت و احترام کی نگاہ سے دیکھےجاتے تھے۔ عزیز میاں 6دسمبر2000کو 58برس کی عمر میں مختصر علالت کے بعد اپنے خالق حقیقی سے جا ملے تھے۔انکی برسی کے موقع پر عزیز میاں کے مداحوں اور شوبز انڈسٹری کی جانب سے ان کی خدمات کے اعتراف پرانہیں خراج عقیدت پیش کیا گیا ہے۔\932