معروف گائیکہ روشن آرا ءبیگم کی برسی جمعہ کو منائی گئی

اسلام آباد (اُردو پوائنٹ اخبارتازہ ترین - اے پی پی۔ 06 دسمبر2024ء) معروف گلوکارہ روشن آراء بیگم کی برسی جمعہ کو منائی گئی۔انہوں نے سینکڑوں فلموں میں پلے بیک گلوکاری کی ۔روشن آرا بیگم نے پہلی نظر، جگنو، قسمت، روپ متی، باز بہادر، نیلا پربت سمیت سینکڑوں فلموں میں پلے بیک سنگر کے طور پر انتہائی خوبصورت نغمات ریکارڈ کروائے جنہوں نے ان فلموں کو کامیابی سے ہمکنار کرنے میں اہم کردار ادا کیا۔

(جاری ہے)

روشن آرا بیگم 1917 میں کلکتہ میں استاد عبدالحق خان کے گھر پیدا ہوئیں اور تقسیم پاکستان کے بعد انہوں نے لاہور منتقل ہوکر گلوکاری کا آغاز کیا۔ انہوں نے کیرانہ گھرانے سے تعلق رکھنے والے اپنے کزن استاد عبدالکریم خان سے مسلسل 15سال تک گائیکی کی تربیت حاصل کرکے اپنی الگ شناخت بنائی۔روشن آرا ءبیگم نے فیروز نظامی، انیل، بسواس، تصدق حسین جیسے موسیقاروں کے ساتھ بھی گانے ریکارڈ کرائے۔ کلاسیکی موسیقی کا یہ روشن ستارہ 6دسمبر 1982کو ہمیشہ ہمیشہ کیلئے غروب ہو گیا۔ روشن آراء بیگم کی برسی کے موقع پر ان کے مداحوں اور شوبز انڈسٹری کی جانب سے ان کی خدامات کے اعتراف میں انہیں خراج تحسین پیش کیا گیا۔