قومی جوڈو چیمپئن شپ 30 اپریل سے اسلام آباد میں شروع ہو گی

اسلام آباد (اُردو پوائنٹ اخبارتازہ ترین - اے پی پی۔ 26 اپریل2019ء) پاکستان جوڈو فیڈریشن کے زیراہتمام 26 ویں مینز اینڈ 9 ویں ویمنز قومی جوڈو چیمپئن شپ 30 اپریل سے پاکستان سپورٹس کمپلیکس اسلام آباد میں شروع ہو گی۔ پاکستان آرمی ایونٹس میں ٹائٹل کا دفاع کرے گی۔ پاکستان جوڈو فیڈریشن کے چیئرمین کرنل (ر ) شجاعت علی رانا نے بتایا کہ چیمپئن شپ کی تیاریاں زور شور پر ہیں جس میں ملک بھر سے 15 ٹیمیں حصہ لیں گی۔

جس میں پاکستان آرمی، پاکستان واپڈا ،پاکستان ریلوے ،پاکستان پولیس، ہائر ایجوکیشن کمیشن، پاکستان نیوی، پنجاب، سندھ، بلوچستان، خیبر پختونخوا، اسلام آباد،فاٹا، آزاد جموں و کشمیر، گلگت بلتستان اور ڈی ایچ اے شامل ہیں۔ انہوں نے کہا کہ پہلی مرتبہ انٹرنیشنل رولز کے مطابق مینز اینڈ ویمنز ٹیم ایونٹس کو بھی شامل کیا گیا ہے۔

(جاری ہے)

پہلے صرف انفرادی مقابلے منعقد کئے جاتے تھے۔

ایونٹس کے انفرادی مردوں کے مقابلوں میں 50کلو گرام ‘55 ‘ 60 ‘ 66‘ 73‘ 81‘ 90‘ 100‘ پلس 100 اور اوپن کیٹیگری کے مقابلے ہونگے۔ خواتین ایونٹس میں 40‘ 44‘ 48‘ 52‘ 57‘ 63‘ 70 اور اوپن کیٹیگری کے مقابلے کھیلے جائیں گے جبکہ ٹیم ایونٹ گرلز کے مقابلوں میں 52‘ 57‘ 63‘ 70 اور پلس کیٹیگری کے مقابلے کھیلے جائیں گے۔ لڑکوں کے ٹیم ایونٹ میں 66‘ 73‘ 81‘ 90 اور پلس 90 کے مقابلے کھیلے جائیں گے۔ اس ایونٹ میں شاندار کارکردگی دکھانے والے کھلاڑیوں کو نیپال میں رواں سال دسمبر میں ہونے والے سائوتھ ایشین گیمز کی تیاری کیلئے تربیتی کیمپ میں شارٹ لسٹ کیا جائے گا۔ چیمپئن شپ 4 مئی تک جاری رہے گی۔