ڈی آئی جی شرجیل کھرل کے اہلکاروں کی پرائیوٹ گاڑی کو چیکنگ کیلئے روکنا جیکب آباد پولیس کو مہنگا پڑ گیا

پیر 2 اکتوبر 2017 18:44

جیکب آباد(اُردو پوائنٹ اخبارتازہ ترین - این این آئی۔ 02 اکتوبر2017ء) بلوچستان کے ڈی آئی جی شرجیل کھرل کے اہلکاروں کی پرائیوٹ گاڑی کو چیکنگ کے لیے روکنا جیکب آباد پولیس کو مہنگا پڑ گیا،بلوچستان پولیس نے چوکی انچارج کی دھلائی کرکے گرفتار کرلیا ۔

(جاری ہے)

تفصیلات کے مطابق جیکب آباد میں 10محرم الحرام کو سیکورٹی کے سخت اقدامات کرتے ہوئے ایس ایس پی جیکب آباد سرفراز نواز شیخ نے سندھ بلوچستان کی سرحد کو بندکرکے ہر آنے جانے والی گاڑی کی مکمل تلاشی لینے کے احکامات جاری کئے تھے ، گذشتہ روز 10محرم الحرام کے روز جیکب آباد کے صدر تھانہ کی حدود سندھ بلوچستان کی سرحد پر واقع عمرانی لاڑو پولیس چیک پوسٹ پر تعینات اے ایس آئی عزیز کٹو نے بلوچستان سے آنے والی ایک گاڑی کو روکا توگاڑی میں موجود لوگوں نے کہا کہ یہ گاڑی ڈی آئی جی جعفرآباد شرجیل کھرل کی ہے اور ہم ان کے اہلکار ہیں، اس موقع پرجیکب آباد پولیس اور پرائیوٹ گاڑی میں موجودڈی آئی جی جعفرآباد کے مبینہ اہلکاروں کے درمیان تلخ کلامی ہوئی اور تلخ کلامی کے دوران ڈی آئی جی کے مبینہ اہلکاروں نے پولیس چوکی کے انچارج اے ایس آئی عزیز کٹو کو سخت تشدد کا نشانہ بنایا اور بلوچستان سے پولیس نفری کو طلب کرکے اے ایس آئی عزیز کٹو کو گرفتار کرکے لے گئے بعد ازاں ایس ایس پی جیکب آباد کی مداخلت پر گرفتار اے ایس آئی کو آزاد کرایا گیا، تاہم اس معاملے پر ایس ایس پی سے رابطے کی کوشش کی گئی تو انہوں نے فون اٹینڈ نہیں کیا۔