ڈینگی کے مکمل خاتمہ، احتیاطی تدابیراور عوامی آگہی کے حوالہ سے سیمینار کا انعقاد

جھنگ۔12 جولائی(اُردو پوائنٹ اخبارتازہ ترین - اے پی پی۔ 13 جولائی2018ء) ڈینگی کے مکمل خاتمہ، احتیاطی تدابیراور عوامی آگہی کے حوالہ سے محکمہ صحت کے زیر اہتمام ضلع کونسل جناح ہال میں سیمینار کا انعقاد کیا گیاجس میں سی ای او ہیلتھ ڈاکٹر اختر حسین اورمیڈیکل سپرنٹنڈنٹ حبیب احمد بٹرسمیت محکمہ سوشل ویلفیئر ، ریسکیو1122، تعلیم ، پاپولیشن ویلفیئر اور دیگر محکموں کے افسر ان، این جی او ز کے نمائندگان اور سماجی شخصیات نے شرکت کی۔

تقریب کے دوران سی ای او ہیلتھ ڈاکٹر اختر حسین نے انسداد ڈینگی وائرس کے بارے آگہی ،وائرس پھیلنے کے اسباب ،حفاظتی اقدامات اور احتیاطی تدابیر اپنانے کے بارے شرکاء کو روشناس کرایا۔انہوںنے کہا کہ ہمار ا مذہبی فریضہ بنتا ہے کہ ماحول کو ہمہ وقت صاف ستھرا رکھا جائے جس سے نہ صرف مختلف امراض کے اثرات سے بچا جاسکے گا بلکہ ڈینگی وائرس کے خدشات بھی پیدانہیں ہونگے۔

(جاری ہے)

انہوںنے کہا کہ معاشرے کو صحت مند بنانا حکومت کی اولین ترجیح ہے لہٰذا حکومت کی طرف سے جاری انسداد ڈینگی مہم کے سو فیصد نتائج حاصل کرنے کیلئے میڈیا کوریج کے ذریعے عوام میںآگہی دی جائے۔ انہوںنے بتایا کہ ضلعی انتظامیہ کی طرف سے ڈینگی مچھر کی افزائش کے اسباب اور تدارک کے حوالہ سے ضلع سے حساس مقامات، ٹائر شاپس ،کباڑ خانوں، فیکٹریوں اور دیگر پبلک مقامات پرصفائی ستھرائی کے نظام کو بہتر بنانے کیلئے کمیٹیاں تشکیل دے دی گئی ہیں جو کھڑے پانی کے اخراج اور ڈینگی کے لاروا کی نشاندہی کرنے کے ساتھ ساتھ وہاں پر سپرے اور دیگر امور کا جائزہ لیں گی۔

سی ای او ہیلتھ نے مزید بتایا کہ ڈپٹی کمشنرحافظ شوکت علی انسداد ڈینگی مہم کو سو فیصد کامیاب بنانے کیلئے تمام امور کی خود مانیٹرنگ کر رہے ہیں۔اس موقع پر میڈیا اور سول سوسائٹی کے نمائندوں نے انسداد ڈینگی مہم کے حوالہ سے عوام میں آگہی پیدا کرنے کے حوالہ سے بھرپور کردار ادا کرنے کی یقین دہانی کرائی۔