جھنگ، بس اور گاڑی میں خوفناک تصادم ، 6 افراد جاں بحق ،7زخمی ہوگئے

پیر 25 اپریل 2022 18:19

جھنگ (اُردو پوائنٹ اخبارتازہ ترین - این این آئی۔ 25 اپریل2022ء) لیہ روڈ کپوری اڈا کے قریب بس اور گاڑی میں خوفناک تصادم کے نتیجے میں 6 افراد جاں بحق اور 7زخمی ہوگئے۔ تفصیلات کے مطابق جھنگ لیہ روڈ پر تھانہ گڑھ مہاراجہ کے علاقہ میں کپوری اڈہ کے قریب کیری ڈبہ اور کوسٹر میں تصادم ہوا، جس کے نتیجے میں دوخواتین سمیت چھ افراد موقع پر جاں بحق جبکہ سات شدید زخمی ہوگئے۔

(جاری ہے)

لیہ روڈ پر ہونے والے افسوسناک حادثے میں کیری ڈبہ کے مسافر لیہ سے فیصل آباد جارہے تھے کہ کپوری اڈا کے قریب گاڑی کا ٹائیر برسٹ ہونے سے مخالف سمت سے آنے والی کوسڑ بس سے ٹکرا گئی۔حادثہ اس قدر شدید تھا کہ کیری ڈبہ دس میٹر تک بس کے ساتھ گھسٹتا چلا گیا اور کیری ڈبے میں سوار چھ افراد موقع پر جاں بحق جبکہ کوسٹر بس میں سوار سات افراد شدہد زخمی ہوگئے۔ریسکیو نے زخمیوں اور میتوں کو رورل ہیلتھ سینٹر گڑھ مہاراجہ اور ٹی ایچ کیو احمد پور سیال منتقل کردیا گیا ہے جبکہ تین شدید زخمیوں کو نشتر اسپتال ملتان منتقل کیا جارہا ہے۔ریسکیو اور پولیس نے جائے حادثہ کو گھیر رکھا ہے اور ہسپتال میں ایمرجنسی لگا دی گئی ہے۔