رائس ایکسپوٹرز ٹرانسپورٹرز کی جانب سے کرایوں میں من مانے اضافے کو مسترد کر تے ہیں، رفیق سلیمان

کراچی(اُردو پوائنٹ اخبارتازہ ترین - این این آئی۔ 16 اگست2018ء) رائس ایکسپورٹرز ایسو سی ایشن آف پاکستان REAPکے سینیئر وائس چیئرمین رفیق سلیمان نے REAPکے ممبران کا ایک ہنگامی اجلاس طلب کیا جس میں ٹرانسپورٹرز کی جانب سے کرایوں میں حالیہ اضافے پر شدید تحفظات کا اظہار کرتے ہوئے کہا کہ جب 2013میں ڈیزل کی قیمتیں اوسطاًً 115-120روپے فی لیٹر تھیں اسوقت انہوں نے قیمتو ں میں اضافے کے تناسب سے ٹرانسپورٹ کے چارجز بڑھائے تھے ۔

گزشتہ کئی سالوں سے ڈیزل کی قیمتوں کا رحجان مسلسل کمی کی جانب تھا مگر ٹرانسپورٹرطبقے نے کمی کا کوئی فائدہ ایکسپورٹرز کو منتقل نہیں کیا جو کہ سراسر زیادتی ہے۔ اب جبکہ ڈیزل کی قیمتیں 113-114روپے فی لیٹر ہے مگر ٹرانسپورٹرز نے کرایوں میں 50فیصد تک اضافہ کر دیا ہے مثلاًً پورٹ قاسم سے سائٹ ایریا کے چارجز جو کہ 2013میں 9000روپے تھے اسکو بڑھا کر 13000روپے کر دیا گیا ہے اور کراچی پورٹ سے سائٹ /ٹرک اڈا کا کرایہ6500سے بڑھا کر 8000روپے کر دیا گیا ہے ۔

(جاری ہے)

اسی طرح دیگر روٹس پر بھی بے تحاشا اضافہ کیا گیا ہے ۔ انہوں نے بتایا کہ رائس ایکسپورٹ کا شعبہ اس وقت ملک میں سب سے زیادہ ٹرانسپورٹرزکی خدمات حاصل کر تا ہے مگر ٹرانسپورٹرز نے رائس ایکسپورٹرز ایسو سی ایشن کو اعتماد میں لئے بغیر ہی کرایوں میں من مانا اضافہ کر دیا جو کہ ملک کی ٹریڈ کی بہتری کیلئے مناسب نہیں حالانکہ اسوقت بھی ڈیزل کی قیمتیں 2013کے مقابلے میں زیادہ نہیں بڑھیں ۔

اسکے علاوہ اسوقت پورے ملک کی ایکسپورٹ کا شعبہ پہلے ہی زبوں حالی کا شکار ہے اور اسے مختلف قسم کے مقامی اور بین الاقوامی چیلنجز کا سامنا ہے ۔ انہوں نے وزارت تجارت، وزارت خزانہ، وزارت پورٹ اینڈ شپنگ ، کراچی چیمبر آف کامرس اینڈ انڈسٹری (KCCI)سے اپیل کر تے ہوئے کہا کہ ٹرانسپورٹرز کی جانب سے بڑھائے گئے اضافے کا نوٹس لیا جائے اور تجارتی طبقے کے مجموعی مفاد کو مد نظر رکھتے ہوئے مناسب حد تک اضافے کی اجازت دی جائے ۔