تیل کے درآمدی بل میں جولائی تا اکتوبر 16.8 فیصد اضافہ

مشینری کی درآمدات میں 17.8فیصد کمی،درآمدات کا حجم 3.03ارب ڈالر ہوگیا، ادارہ شماریات پاکستان

پیر 19 نومبر 2018 20:22

تیل کے درآمدی بل میں جولائی تا اکتوبر 16.8 فیصد اضافہ

کراچی(اُردو پوائنٹ اخبارتازہ ترین - این این آئی۔ 19 نومبر2018ء) رواں مالی سال 2018-19 کے پہلے 4 ماہ میں جولائی تا اکتوبرکے دوران تیل کے درآمدی بل میں 16.8فیصد کا اضافہ ہوا ہے۔

(جاری ہے)

ادارہ برائے شماریات پاکستان (پی بی ایس)کے اعدادوشمار کے مطابق مقدار کے لحاظ سے پٹرولیم مصنوعات کی درآمدات میں 40.33 فیصد یعنی 3.65 ملین ٹن کی کمی ہوئی ہے تاہم قیمتوں میں اضافہ اور پاکستانی کرنسی کی مالیت میں کمی کی وجہ سے پٹرولیم مصنوعات کی درآمدات میں 16فیصد سے زائد کا اضافہ ہوا ہے۔

پی بی ایس کے مطابق رواں مالی سال کے پہلے 4 مہینوں کے دوران مشینری کی درآمدات میں 17.8فیصد کی کمی سے درآمدات کا حجم 3.68ارب ڈالر کے مقابلے میں 3.03 ارب ڈالر تک کم ہوگیا۔ اسی طرح ٹرانسپورٹ گروپ کی درآمدات میں بھی 19.28فیصد کی کمی سے درآمدی بل 1.29ارب ڈالر سے 1.04 ارب ڈالر تک کم ہوگیا۔پی بی ایس کے مطابق جاری مالی سال میں مجموی قومی درآمدات میں 0.1 فیصد کی کمی ہونے سے درآمدی بل جولائی تا اکتوبر کے دوران 19.06 ارب ڈالر ریکارڈ کیا گیا ہے۔