پٹرول کی درآمد میں اضافہ،برآمدات میں کمی ،تجارتی خسارہ بے قابو

پاکستان پر مجموعی غیر ملکی قرضے جی ڈی پی کے 65 فیصد سے تجاوز کرچکے ،نہایت الارمنگ صورتحال ہے ،اقتصادی ماہرین

جمعرات 13 دسمبر 2018 13:26

کراچی(اُردو پوائنٹ اخبارتازہ ترین - این این آئی۔ 13 دسمبر2018ء) ڈالر کے مقابلے میں روپے کی گرتی ہوئی قیمت کے باعث پاکستان قرضوں کے مزید بوجھ تلے دب گیا ہے ، گزشتہ تین ماہ کے دوران روپے کی قدر میں 16 روپے سے زائد کا اضافہ ہونے کے باعث پاکستان پر قرضوں کا بوجھ ساڑھے 12 فیصد تک بڑھ گیا ہے ۔ ماہرین کے مطابق پٹرول کی درآمدات میں اضافے اور مجموعی برآمدات میں کمی کے باعث تجارتی خسارہ بے قابو ہوا جبکہ قانونی ذرائع سے ترسیلات زر میں نمایاں کمی کے بعد ادائیگیوں میں تقریبا 3 ارب ڈالر کا شارٹ فال موجود ہے ۔

ماہرین کے مطابق آئی ایم ایف کی شرائط کے علاوہ زر مبادلہ ذخائر بڑھانے کیلئے اوپن مارکیٹ سے ڈالر خریدنا، پاکستان میں غیر ملکی سفارت خانوں کے اخراجات، بینک ٹرانزیکشنز پر ٹیکس کے بعد ڈالر میں ٹرانزیکشنز اور سٹے بازی ڈالر چڑھنے کی بنیادی وجوہات ہیں ۔

(جاری ہے)

اعداد و شمار کے مطابق پاکستانی کرنسی کی قدر میں گزشتہ 40سال سے مسلسل کمی واقع ہورہی ہے ،اس کے نتیجے میں ہمارا تجارتی خسارہ بڑھا، درآمدات کی لاگت بڑھنے سے خام مال مہنگا ہوا جس سے صنعتوں کی پیداواری لاگت میں اضافہ ہوا اور برآمد کنندگان کو نقصان اٹھاکر غیرملکی خریداروں سے کئے ہوئے معاہدے پورے کرنا پڑے ۔

ماہرین معیشت کا کہنا ہے کہ ناقص معاشی حکمت عملی کے باعث معیشت کمزور ہوئی ہے ، اس وقت پاکستان پر مجموعی غیر ملکی قرضے جی ڈی پی کے 65 فیصد سے تجاوز کرچکے ہیں جو نہایت الارمنگ صورتحال ہے ۔