فروٹ ویجیٹیبل ایسوسی ایشن نے فیڈریشن کا دفتر اسلام آباد منتقل کرنے کی تجویز مسترد کردی

کراچی (اُردو پوائنٹ اخبارتازہ ترین - این این آئی۔ 11 جولائی2020ء) آل پاکستان فروٹ اینڈ ویجیٹبل ایسوسی ایشن (پی ایف وی ای) نے وفاق ایوان ہائے صنعت و تجارت پاکستان (ایف پی سی سی آئی) کا صدر دفتر کراچی سے اسلام آباد منتقل کرنے کی تجویز کو مسترد کرتے ہوئے اسے تاجروں کے وفاق اور اہم ترین پلیٹ فارم کو ملک کی معاشی شہہ رگ کراچی سے دور کرنے کی سازش قرار دیا ہے۔

ایسوسی ایشن کے سرپرست اعلیٰ وحید احمد نے ایف پی سی سی آئی کا صد ر دفتر کراچی سے اسلام آباد م منتقل کرنے کی تجویزپر ردعمل کا اظہار کرتے ہوئے کہا کہ ایف پی سی سی آئی پر برسراقتدار گروپ کرونا کی وباء کی وجہ سے معاشی بحران کا شکار تاجربرادری بالخصوص ایس ایم ایز اور چھوٹے تاجروں کو کوئی ریلیف نہ دلواسکا۔

(جاری ہے)

کراچی جو معیشت کا مرکز اور ملک کو 70فیصد ریونیو دینے والا شہر ہے۔

پھل اور سبزیوں کے ساتھ دیگر برآمدات اور درآمدات کراچی کی بندرگاہوں سے کی جاتی ہیں اور تاجر برادری کے زیادہ تر مسائل کا تعلق بھی کراچی میں موجود وفاقی حکومت کے اداروں سے ہوتا ہے، ایف پی سی سی آئی کی موجودہ قیات ان وفاقی اداروں سے تاجر برادری کے مسائل حل کرانے میں ناکام رہی بالخصوص کرونا کی وباء کے دوران عائد ہونے والے ڈیمرج اور شپنگ کمپنیوں کے جرمانوں میں کوئی کمی نہ کرائی گئی اسی طرح وفاقی بجٹ میں بھی ایف پی سی سی آئی کی بیشتر تجاویز کو نظر انداز کردیا گیا۔

پی ایف وی اے کے سرپرست اعلیٰ وحید احمد نے کہا کہ ایک ایسے وقت میں جبکہ ملک کو سب سے زیادہ ریونیو دینے والا شہر کراچی کا انفرااسٹرکچر تباہ حال ہے، صنعتیں لوڈ شیڈنگ اور مہنگی بجلی کی وجہ سے بند ہورہی ہیں۔ پاکستان کے سب سے اہم تجارتی پلیٹ فارم کے کراچی میں موجود صدر دفتر سے کراچی کے بنیادی مسائل کے حل کے لیے کوئی موثر آواز نہیں اٹھائی گئی اور اب صدر دفتر منتقل کرنے پر غور کیا جارہا ہے۔

انہوں نے کہا کہ ایف پی سی سی آئی میں برسراقتدار گروپ اندرونی سطح پر ٹوٹ پھوٹ اور رسہ کشی کا شکار ہے۔ غیرمنتخب نمائندوں نے صدر دفتر یرغمال بنارکھا ہے اور ایف پی سی سی آئی کی قیادت اندرونی اختلافات اور رسہ کشی پر پردہ ڈالنے کے لیے ایف پی سی سی آئی کا صدر دفتر اسلام آباد منتقل کرنے کی تیاریاں کررہی ہیں۔ پی ایف وی اے ایف پی سی سی آئی کا صدر دفتر کراچی سے اسلام آباد منتقل کرنے کی بھرپور مخالفت کرتی ہے اور ایف پی سی سی آئی کی موجودہ قیادت سے مطالبہ کرتی ہے کہ تاجروں کے وفاق کی اہمیت کو مزید کم کرنے کے بجائے تاجروں کے حقیقی مسائل پر توجہ دی جائے۔

پی ایف وی اے نے ایف پی سی سی آئی میں برسراقتدار گروپ کو مشورہ دیا کہ اگر تاجر برادری کے مسائل کا حل فراہم نہیں کرسکتے تو ایف پی سی سی آئی جیسے قومی یلیٹ فارم کو کمزور نہ بنایا جائے اور ایف پی سی سی آئی کا صدر دفتر کراچی میں ہی برقرار رکھا جائے۔