روئی کی فروخت جاری رہنے کی وجہ سے روئی کے بھاؤ میں مجموعی طور پر استحکام رہا

ہفتہ 5 دسمبر 2020 22:10

روئی کی فروخت جاری رہنے کی وجہ سے روئی کے بھاؤ میں مجموعی طور پر استحکام رہا
کراچی (اُردو پوائنٹ اخبارتازہ ترین - این این آئی۔ 05 دسمبر2020ء) مقامی کاٹن مارکیٹ میں گزشتہ ہفتے کے دوران ٹیکسٹائل واسپنگ ملزکی جانب سے اچھی کوالٹی کی روئی کی خریداری میں دلچسپی اور جنرز کی جانب سے بھی روئی کی فروخت جاری رہنے کی وجہ سے روئی کے بھاؤ میں مجموعی طور پر استحکام رہا گو کہ دن بدن پھٹی کی کوالٹی گرتی جا رہی ہے اس لیے ٹیکسٹائل کے بڑے گروپ بھی اچھی کوالٹی کی روئی ہاتھ کر رہے ہیں اس کی وجہ سے کاروباری حجم بھی برقرار رہا۔

کپاس کی پیداوار کم ہونے کی وجہ سے 22 فیصد جننگ فیکٹریاں بلکل چلی ہی نہیں جبکہ کئی جننگ فیکٹریاں جزوی طور پر چل کر بند ہوچکی ہیں کپاس کی پیداوار تشویشناک حد تک متواتر کم ہونے کی وجہ سے کپاس کی کاشت کاروں کی طرح کئی جنرز بھی دلبرداشتہ ہوگئے ہیں اور دیگر کاروبار کی طرف راغب ہو رہے ہیں اگر صورتحال میں کوئی مثبت اضافہ نہ ہوسکا تو ملک میں کپاس کا کاروبار اسی طرح کم ہوتا جائے گا۔

(جاری ہے)

ہفتہ کے دوران صوبہ سندھ میں روئی کا بھاؤ فی من 8600 تا 9550 روپے پھٹی کا بھاؤ فی 40 کلو 3300 تا 4200 روپے صوبہ پنجاب میں روئی کا بھاؤ فی من 8800 تا 9600 روپے پھٹی کا بھاؤ فی 40 کلو 3400 تا 5000 روپے صوبہ بلوچستان میں روئی کا بھاؤ فی من 8600 تا 9200 روپے پھٹی کا بھاؤ فی 40 کلو 4000 تا 4800 روپے رہا۔کراچی کاٹن ایسوسی ایشن کی اسپاٹ ریٹ کمیٹی نے اسپاٹ ریٹ فی من 9450 روپے کے بھاؤ پر مستحکم رکھا۔

کراچی کاٹن بروکرز فورم کے چیئرمین نسیم عثمان نے بتایا کہ بین الاقوامی کاٹن مارکیٹوں میں مجموعی طور پر روئی کے بھاؤ میں ملا جلا رجحان رہا نیویارک کاٹن مارکیٹ میں روئی کے وعدے کا بھاؤ مستحکم رہا۔ USDA کی ہفتہ وار برآمدی رپورٹ کے مطابق گزشتہ ہفتے کے نسبت روئی کی برآمد میں 22 فیصد کمی واقع ہوئی لیکن روئی کے وعدے کے بھاؤ پر اس کا اثر نہیں ہوا امریکہ اور چین کے مابین دوبارہ اقتصادی کشیدگی شروع ہو چکی ہے تاہم اب تک چین امریکہ سے وافر مقدار میں روئی درآمد کر رہا ہے COVID-19 کی وجہ سے بھی بین الاقوامی مارکیٹوں میں کاروبار کم ہوتا جارہا ہے برازیل ارجنٹینا اور وسطی ایشیا کے ممالک میں روئی کے بھاؤ میں نسبتا استحکام رہا جبکہ بھارت میں کپاس کی پیداوار زیادہ ہونے کی خبروں کے سب روئی کے بھاؤ میں مندی کا رجحان رہا گزشتہ ہفتے کے دوران روئی کے بھاؤ میں فی کینڈی (356 کلو) میں تقریبا 1000 روپے کی کمی واقع ہوئی گو کہ کاٹن کارپوریشن آف انڈیا CCI کی جانب سے روئی کے بھاؤ کے Support کیلئے نئی سیزن کی ابتدا سے ہی روئی کی خریداری شروع کردی ہے موصولہ اطلاعات کے مطابق تاحال CCI نے جنرز سے تقریبا 32 لاکھ گانٹھیں خریدی ہیں جبکہ پہلے ہی CCI کے پاس گزشتہ سال کی روئی کی تقریبا 40 لاکھ گانٹھوں کا اسٹاک موجود ہے۔

بھارت کے ٹیکسٹائل سیکٹر کے ذرائع نے بتایا کہ فی الحال ٹیکسٹائل ملز کے پاس روئی کا وافر اسٹاک موجود ہے جس کی وجہ سے مارکیٹ سے روئی کی خریداری نسبتا کم کر رہے ہیں بھارت میں روئی کے بھاؤ میں کمی کی ایک وجہ یہ بھی ہے ذرائع کے مطابق 21-2020 کی کپاس کی نئی سیزن میں بھارت میں روئی کی کل پیداوار کا تخمینہ نجی شعبہ 3 کروڑ 60 لاکھ گانٹھوں کے لگ بھگ لگا رہے ہیں تاہم فی الحال بھارت میں روئی کی تقریبا 85 لاکھ گانٹھیں تیار ہوچکی ہے۔

کراچی میں شائع ہونے والی مزید خبریں