آصف علی زر داری اور عمران خان کے کاغذات نامزدگی پر اعتراضات اٹھا دیئے گئے

جمعرات 14 جون 2018 14:39

کراچی (اُردو پوائنٹ اخبارتازہ ترین - این این آئی۔ 14 جون2018ء) سابق صدر آصف علی زرداری اور چیئرمین تحریک انصاف عمران خان کے کاغذات نامزدگی پر اعتراضات اٹھا دیے گئے ہیں۔ نوابشاہ میں دو درخواست گزاروں نے آصف علی زرداری کے نامزدگی فارم پر اعتراض اٹھاتے ہوئے کہا کہ انہوں نے زرعی ٹیکس اور نہری پانی کے استعمال کا ٹیکس نہیں دیا اس لیے انہیں الیکشن کیلئے نااہل قرار دیا جائے۔

ایک درخواست گزار نے مؤقف اختیار کیا کہ آصف زرداری نے سانگھڑ میں 1500 ایکڑ زمین خریدی تاہم اس پر زرعی ٹیکس نہیں دیا۔ ریٹرننگ آفیسر محمد محبوب اعوان نے درخواستیں سنتے ہوئے آصف علی زرداری کو نوٹس جاری کر دیا ،ْ درخواستوں پر سماعت 18 جون کیلئے مقرر کر دی گئی۔یاد رہے کہ پیپلز پارٹی کے شریک چیئرمین آصف علی زرداری نے قومی اسمبلی کے حلقہ این اے 213 شہید بے نظیرآباد سے کاغذات نامزدگی جمع کرائے ہیں۔

(جاری ہے)

آصف علی زرداری کے مدمقابل سندھ ترقی پسند پارٹی کے چیئرمین ڈاکٹر قادر مگسی نے کاغذات نامزدگی جمع کرا رکھے ہیں ،ْدوسری جانب چیئرمین تحریک انصاف عمران خان کے این اے 131 لاہور سے جمع کرائے گئے کاغذات نامزدگی پر جسٹس اینڈ ڈیموکریٹک پارٹی کی جانب سے اعتراضات اٹھائے گئے ۔ ریٹرننگ افسر نے عمران خان کو 18 جون کو ذاتی حیثیت میں طلب کرلیا ،ْ دستاویزی اعتراضات کے شواہد عمران خان کو بھی بھیجنے کا حکم دیا گیا ہے۔